नवी दिल्ली (वृत्तसंस्था) ‘न्यू दिल्ली टेलिव्हिजन लिमिटेड’ अर्थात एनडीटीव्ही या वृत्त प्रसारण वाहिनीचे संस्थापक-प्रवर्तक प्रणॉय आणि राधिका रॉय यांनी प्रवर्तक कंपनी ‘आरआरपीआर होल्डिंग्ज’ म्हणजेच आरआरपीआरएचच्या प्रवर्तक (प्रमोटर) पदाचा राजीनामा दिला आहे. एनडीटीव्ही लिमिटेडनं मंगळवारी स्टॉक एक्सचेंजला ही माहिती दिली.
दोघांचे राजीनामे तात्काळ मंजूर करण्यात येणार आहेत. सुदिप्त भट्टाचार्य, संजय पुगलिया आणि संथिल समिया चंगलवारयान यांना तत्काळ NDTV चं संचालक बनवण्यात आलंय. आरआरपीआर होल्डिंगनं स्टॉक एक्स्चेंजला पाठवलेल्या पत्रात म्हटलंय की, शेअर्सच्या हस्तांतरणामुळं अदानी समूहाला एनडीटीव्हीमध्ये 29.18 टक्के हिस्सा मिळणार आहे. यासह अदानी समूह 5 डिसेंबरला अतिरिक्त 26 टक्के समभागासाठी खुली ऑफर देत आहे. एनडीटीव्हीने सोमवारी दिलेल्या माहितीनुसार संस्थापकांचा समावेश असलेल्या या प्रवर्तक कंपनीने अदानी समूहाला कंपनीच्या मालकीचा काही हिस्सा विकल्याचं सांगितलं.
प्रवर्तक कंपनी असलेल्या आआरपीआर होल्डिंग्ज प्रायव्हेट लिमिटेड कंपनीच्या बोर्ड ऑफ डायरेक्टर्सच्या आज म्हणजेच २९ नोव्हेंबर २०२२ रोजी झालेल्या बैठकीमध्ये पुढील गोष्टी मान्य करण्यात आल्या… १) सुदिप भट्टाचार्य, संजय पुगालिया आणि सेंथिल सिन्हा चेंगालवरयाना यांची आरआरपीआरएचच्या डायरेक्टरपदी निवड करण्यात येत आहे. ही नियुक्ती तात्काळ प्रभावाने लागू असेल. २) प्रणॉय रॉय आणि राधिका रॉय यांनी आरआरपीआरएचच्या डायरेक्टर पदाचा राजीनामा दिला आहे. आज व्यवहार बंद होण्याच्या क्षणापासून हे बदल लागू असतील,” असं म्हटलं आहे.
ऑगस्टमध्ये अदानी समूहानं मीडिया फर्ममधील 29.18 टक्के हिस्सा अप्रत्यक्षपणे विकत घेतल्यानंतर ओपन ऑफर ठेवण्याची आवश्यकता सुरू झाली. भारताच्या भांडवली बाजार नियामकानं या महिन्याच्या सुरुवातीला खुल्या ऑफरला मान्यता दिली होती. अदानींनी कंपनीत रस दाखवल्यानंतर एनडीटीव्हीचे शेअर्सही वाढले आहेत. यावर्षी जवळपास 250 टक्के शेअर्स वाढले आहेत.
