जळगाव (प्रतिनिधी) गोल्डबार्स यामध्ये ट्रेडिंग केल्यास तुम्हाला चांगले रिटर्नस मिळतील, असे सांगून महावितरण मधील सहाय्यक अभियंताची ८ लाख ८५ हजारांची फसवणूक झाल्याची घटना उघडकीस आली आहे. याप्रकरणी जळगाव सायबर पोलीस ठाण्यात एकाविरुद्ध गुन्हा दाखल करण्यात आला आहे.
यासंदर्भात सहाय्यक अभियंता देवेंद्र मोतीराम सिडाम (वय ३३, रा. शिवदत्त नगर घर क्र.४ भुसावळ) यांनी दिलेल्या फिर्यादीनुसार, दि. २६ डिसेंबर २०२१ दरम्यान ते दि.१० फेब्रुवारी २०२२ पावेतो फिर्यादीचे व्हॉटसअॅपवर व्हॉटसअॅप मो.क्रं.+६०११११८३८४० यावरुन गोल्डबार्स यामध्ये ट्रेडिंग केल्यास तुम्हाला चांगले रिटर्नस मिळतील असे आरोपीतांनी सांगून सिडाम यांना Dotgold हे अॅप्लीकेशन इन्स्टॉल करण्यास लावले. तसेच व्हॉटसअॅप व टेलिग्रामवरुन सिडाम यांना वेळोवेळी व्हॉट्सअॅप कॉल व व्हॉट्सअॅप मेसेज करुन आजपावेतो सिडाम यांची गुंतवणुक केलेल्या एकुण ८,८५,००० रुपयांवर २५,००,००० रुपये नफा झाला असल्याचे भासविले. तसेच त्यांच्याकडून वेळोवेळी ८,८५,००० रुपये ऑनलाईन स्विकारुन सिडाम यांची आर्थिक फसवणुक केली. याप्रकरणी जळगाव सायबर पोलीस ठाण्यात एकाविरुद्ध गुन्हा दाखल करण्यात आला असून पुढील तपास पो.नि. लिलाधर कानडे हे करीत आहेत.
