नागपूर (वृत्तसंस्था) अनैतिक संबंधाचा गावात बोभाटा होऊ नये म्हणून आपल्याच सख्ख्या भावाची गळा आवळून हत्या केल्याचा धक्कादायक प्रकार उघडकीस आला आहे. संशयित १७ वर्षीय बहिणीसह तिच्या प्रियकराची चौकशी केल्यानंतर पोलिसांनी दोघांना जेरबंद केले आहे.
सुजल नाशिक रामटेके असं हत्या झालेल्या १२ वर्षीय मुलाचं नाव आहे. तो नागपुरजवळील द्रुगधामना येथील रहिवासी आहे. मृत सुजलचे वडील माथाडी कामगार आहेत, तर आई खाजगी नोकरी करते. सोमवारी सुजलचे आई वडील दोघंही कामावर गेले होते. दरम्यान घरी सुजल आणि त्याची सतरा वर्षीय बहीण होती. दुपारी सुजल दुकानात जातो, असं सांगून घराबाहेर पडला होता. पण दीड तासानंतर तो ‘वाचवा, वाचवा’ असं ओरडत घरी आला, त्यानंतर सुजलच्या बहिणीनं त्याला पाणी प्यायला दिलं. त्यानंतर सुजल निपचित पडला, अशी माहिती सुजलच्या बहिणीने शेजाऱ्यांना दिली.
यानंतर घटनास्थळी दाखल झालेल्या पोलिसांना देखील बहिणीनं अशीच माहिती दिली. पण मुलीने सांगितलेल्या घटनाक्रमात अनेक विसंगती आढळून आल्या. तसेच मुलाची गळा आवळून हत्या झाल्याचा संशय पोलिसांकडून व्यक्त करण्यात आला होता. त्यामुळे पोलिसांनी संशयित आरोपी बहीण आणि तिच्या प्रियकराला ताब्यात घेत कसून चौकशी केली आहे. यानंतर दोघांच्या जबाबात अनेक विसंगती आढळल्या आहेत. तसेच घटनास्थळी आढळलेल्या आक्षेपार्ह पुराव्यामुळे अनैतिक संबंधांचा बोभाटा होऊ नये म्हणूनच निरागस सुजलची हत्या करण्यात आल्याचं प्राथमिक तपासात उघड झालं आहे. याप्रकरणी वाडी पोलिसांनी १७ वर्षीय मुलीसह तिच्या प्रियकराला अटक केली आहे. या घटनेचा पुढील तपास पोलीस करत आहेत.
