चाळीसगाव (प्रतिनिधी) जळगाव लोकसभा मतदारसंघाची निवडणूक अतिशय प्रतिष्ठेची झाली असताना भाजपाने विद्यमान खासदार उन्मेश पाटील यांची तिकीट कापून स्मिता वाघ यांना संधी दिली आहे तर दुसरीकडे शिवसेना (उबाठा)कडून उमेदवारांची चाचपणी सुरू आहे. पक्षाकडून काही दिवसांपूर्वी संभाव्य उमेदवारांच्या मुलाखती घेण्यात आल्या. त्यात प्रामुख्याने जिल्हा परीषदेचे माजी सदस्य व केडीएम ग्रुपचे अध्यक्ष नानासाहेब डॉ. उत्तमराव धनाजी महाजन यांना संधी मिळण्याची दाट शक्यता आहे शिवाय डॉ.महाजन हेच महाविकास आघाडीचे प्रबळ दावेदार मानले जात आहेत. मतदारसंघात त्यांच्याच नावाची चर्चा सर्वत्र सुरू आहे.
शैक्षणिक क्रांतीतून घडवले अनेकांचे जीवन
2014 मध्ये पाचोरा विधानसभा निवडणुकीत डॉ.महाजन यांनी भाजपकडून उमेदवारीदेखील केली होती. नानासाहेबांनी वैद्यकीय अधिकारी पदाचा राजीनामा दिल्या नंतर सर्वप्रथम किसान ज्ञानोदय मंडळ गुढे संचलित होमोओपॅथिक वैद्यकीय महाविद्यालय शिरपूर व चाळीसगाव येथे आयुर्वेद वैद्यकीय महाविद्यालय सुरू केले. गेल्या 35 वर्षांच्या काळात या संस्थेच्या अनेक शाखा त्यांनी सुरू केल्या आहेत. यात बी.फार्मसी, डीफार्मसी, इंजिनिअरिंग, पॉलिटेक्निक, अध्यापक विद्यालय, नर्सिंग कॉलेज, इंग्लिश स्कुल यासह अनेक शाखांचा समावेश आहे. या सर्व समूहात परिसरातील हजारो विद्यार्थी शिक्षण घेत आहे. या परिसरातील ग्रामीण भागातल्या तळागाळापर्यंत शैक्षणिक गंगोत्री पोहचण्याचे काम या संस्थेच्या माध्यमातून त्यांनी पूर्णत्वास नेले आहे. त्यामुळे शिक्षण क्षेत्रात खान्देशात त्यांनी आपली स्वतंत्र ओळख निर्माण केली आहे.या परिसरातील शहरी व ग्रामीण जनतेच्या आशा- आकांक्षाचे प्रतिक बनलेल्या शिक्षणाच्या माध्यमातून त्यांनी शैक्षणिक व सामाजिक प्रगती घडवून आणून अनेकांचे जीवन समृद्ध करण्याचा प्रयत्न केलेला आहे.
35 वर्षांपासून राजकीय क्षेत्रात सक्रिय
शैक्षणिक, वैद्यकीय क्षेत्रात योगदान देत असतांना गेल्या 35 वर्षांपासून राजकीय पक्षात ही ते सक्रीय आहेत. सुरुवातीला त्यांना गुढे ग्रामपंचायतीच्या सरपंच पदाची संधी मिळाली. या कारकिर्दीत गुढे गावात लोकाभिमुख अनेक योजना त्यांनी मार्गी लावल्या आहेत. गेल्या सहा महिन्यांपूर्वी गुढे ग्रामपंचायतीच्या लोकनियुक्त सरपंच म्हणून नानासाहेबांच्या सहचारिणी सौ.कल्पनाताई उतमराव महाजन निवडून आल्या आहेत. काँग्रेस पक्षाचे अध्यक्ष म्हणून त्यांनी धुरा सांभाळली आहे तसेच माळी समाजाचे जिल्हाध्यक्ष म्हणून त्यांनी कामकाज पाहिले आहे. विद्यापीठाच्या अनेक समित्यांवर ते आहेत. या सर्व क्षेत्रामुळे नानासाहेबांचा जनसंपर्क अतिशय दांडगा असून जळगाव जिल्ह्यात त्यांची सर्वत्र ओळख आहे.
डॉ.महाजन प्रबळ उमेदवार
भाजपाने विद्यमान खासदारांचे तिकीट कापून जळगाव लोकसभा मतदारसंघात स्मिता वाघ यांना संधी दिली आहे तर महाविकास आघाडीकडून अद्याप उमेदवार जाहीर झाला नसलातरी तुल्यबळ उमेदवार देण्यावर भर असल्याने चाचपणी सुरू आहे. महाविकास आघाडीकडून अनेक उमेदवार इच्छूक असलेतरी सक्षम व सामाजिक मतांचा विचार करूनच उमेदवारी निश्चित केली जाणार आहे. डॉ.महाजन हे उच्चशिक्षीत तर आहेतच शिक्षण सामाजिक, राजकीय क्षेत्रातील त्यांचे कर्तृत्व मोठे असल्याने महाविकास आघाडीकडून त्यांना निश्चित संधी मिळेल, असे जाणकारांना वाटते. येत्या एक वा दोन दिवसात महाविकास आघाडीकडून उमेदवारी जाहीर केली जाणार असल्याने याकडे राजकीय क्षेत्रातील धुरिणांसह मतदारांचे लक्ष लागले आहे.
