छत्रपती संभाजीनगर (वृत्तसंस्था) एक लाखाची लाच स्वीकारताना जिन्सी पोलीस ठाण्याच्या डीबी पथकाचा प्रमुख असलेल्या उपनिरीक्षकाला लाचलुचपत प्रतिबंधक पथकाने शुक्रवारी (दि. १४) रात्री अटक केली आहे. शेख अश्फाक मुस्ताक ( ३९ ) असे या उपनिरीक्षकाचे नाव आहे. फसवणूक प्रकरणात साक्षीदारालाच गुन्हा दाखल करण्याची धमकी देत लाच मागण्यात आली होती. विशेष म्हणजे गुन्हे शोध (डीबी) पथकाची त्याने गुरुवारी जबाबदारी स्वीकारली होती. अन् शुक्रवारी तो अडकला.
जिन्सी पोलिस ठाण्यात काही महिन्यांपूर्वी मोठ्या बांधकाम व्यावसायिकाच्या जामीन व फसवणूक प्रकरणात गुन्हा दाखल झाला होता. त्याचा तपास आरोपी उपनिरीक्षक शेखकडे होता. तपास करत असताना त्याने आरोपीसह साक्षीदारांकडे पैशांची मागणी सुरू केली. साक्षीदार असलेल्या व्यक्तीलाच उपनिरीक्षक शेख अश्फाक याने गुन्ह्यात अडकविण्याची धमकी दिली. तसे होऊ द्यावयाचे नसेल तर ५० हजार रुपये द्यावे लागतील, असे सांगितले. त्यानंतर तडजोडीअंती ३० हजार रुपये घेण्याचे मान्य केले.
तक्रारदार लाचेचे ३० हजार रुपये देण्यासाठी गेले असता पूर्वी अटक केलेल्या आरोपींकडे ३ लाख रुपयांपैकी बाकी असलेले १ लाख १० हजार रुपयांची मागणी केली. तडजोडी करून ७० हजार रुपये देण्याचे ठरले. पूर्वीचे ७० हजार आणि आताचे ३० हजार असे एकूण १ लाख रुपयांची मागणी केली. मे २०२३ पासून हा प्रकार सुरू होता.
सततच्या मागणीला कंटाळलेल्या व्यक्तीने लाचलुचपत प्रतिबंधक विभाग गाठून तक्रार दिली. त्यानंतर शुक्रवारी लाचेच्या मागणीची पडताळणी करण्यात आली. खात्री झाल्यानंतर पोलिस निरीक्षक क्षीरसागर यांनी रात्री ९ वाजेच्या सुमारास जिन्सी पोलिस ठाण्यासमोर सापळा रचला. यावेळी फौजदार शेख याने तेथे पैसे न घेता तक्रारदाराच्या दुचाकीवर बसवून त्याला एसीबी शहागंजकडे नेले. एसीबीच्या पथकाने पाठलाग करून भाजीमंडईत त्याला पैसे स्वीकारताना अटक केली. दरम्यान, अश्पाक हा साक्षीदारांनाही आरोपी करण्याच्या धमक्या देत होता. तसेच कारवाई आणि अटक टाळण्यासाठी त्याने एक लाखाची लाच मागितली होती.
