भुसावळ (प्रतिनिधी) राष्ट्रवादीचे ज्येष्ठ नेते आमदार एकनाथराव खडसे यांचे कट्टर समर्थक म्हणून ओळखल्या जाणार्‍या पाच पदाधिकार्‍यांनी सोमवारी सायंकाळी भुसावळ भाजपाचे आमदार संजय सावकारे यांच्या नेतृत्वावर विश्वास ठेवून भाजपात प्रवेश केल्यानंतर शहरातील राजकीय वर्तुळात प्रचंड खळबळ उडाली. मूळ भाजपातच कार्यरत असलेले हे पदाधिकारी आमदार एकनाथराव खडसे यांच्यावरील निष्ठेनंतर राष्ट्रवादीत डिसेंबर 2019 गेले होते मात्र राष्ट्रवादी सोडून त्यांनी सोमवार, 28 रोजी पुन्हा भाजपात प्रवेश केला. आमदार संजय सावकारे यांनी पदाधिकार्‍यांच्या उपस्थितीत त्यांचे भाजपाचे मफलर देवून स्वागत केले.
भाजपामध्ये वाढले ‘इनकमिंग’ !
माजी प्रभारी नगराध्यक्ष प्रमोद नेमाडे, माजी नगरसेवक अ‍ॅड.बोधराज चौधरी, माजी नगरसेविका शोभा नेमाडे यांचे पूत्र दिनेश नेमाडे, माजी नगरसेविका शैलजा नारखेडे यांचे पती पुरूषोत्तम नारखेडे व अनिकेत पाटील यांनी आमदार संजय सावकारे यांच्या सुरभी नगरातील कार्यालयाबाहेर झालेल्या छोटेखानी कार्यक्रमात सोमवारी सायंकाळी भाजपात प्रवेश केला. यावेळी उपस्थितांनी आमदार संजय सवकारे व भाजपाचा जयघोष केला. यापूर्वी माजी नगरसेवक किरण कोलते व माजी नगरसेविका मेघा वाणी यांचे पती देवा वाणी यांनीदेखील राष्ट्रवादीला सोडचिठ्ठी देत भाजपात प्रवेश केल्याने राष्ट्रवादीच्या गोटात प्रचंड खळबळ उडाली होती. आमदार खडसे यांचे कट्टर समर्थकच आता राष्ट्रवादीला सोडचिठ्ठी देत असल्याने भुसावळात राष्ट्रवादीसाठी ही बाब धक्कादायक मानली जात आहे.
निवडणुकांना अवकाश मात्र वातावरण तापले !
आमदार एकनाथराव खडसे व आमदार संजय सावकारे यांच्या नेतृत्वात झालेल्या 2016 मधील पालिका निवडणुकीत भाजपाने पालिकेवर निर्विवाद वर्चस्व मिळवले होते मात्र भाजपातील अंतर्गत कलहानंतर खडसेंनी भाजपाला रामराम करीत राष्ट्रवादीत प्रवेश केल्यानंतर शहरातील राजकीय समीकरणेही बदलली तर भाजपामधून खडसेंवरील निष्ठेपोटी अनेकांनी निवडणूक कालावधी आटोपताच डिसेंबर 20219 मध्ये राष्ट्रवादीत प्रवेश केला मात्र आगामी वर्षभरांनी होणार्‍या निवडणुका पाहता भाजपाला अनुकूल वातावरण असल्याने भाजपामध्ये अलीकडे इनकमिंग वाढले आहे. भुसावळात निवडणुका स्वबळावर होतात की आघाडी होते? याचे उत्तर काळ देणार असलातरी इच्छुकांना आतापासूनची तयारी पूर्ण केली आहे.
भाजपा प्रवेशप्रसंगी यांची उपस्थिती !
पदाधिकार्‍यांच्या प्रवेशप्रसंगी भाजपा शहराध्यक्ष परीक्षीत बर्‍हाटे, युवराज लोणारी, किरण कोलते, राजेंद्र नाटकर, अजय नागराणी, सतीश सपकाळे, बापू महाजन, संतोष बारसे, मुकेश पाटील, पिंटू ठाकूर, निकी बत्रा, प्रा.प्रशांत पाटील, सामाजिक कार्यकर्ते प्रमोद सावकारे आदींसह पदाधिकारी व कार्यकर्ते उपस्थित होते.
स्वगृहीत परतलेले कार्यकर्ते भाजपाचेच : आमदार संजय सावकारे !
भाजपात प्रवेश केलेले पदाधिकारी हे पूर्वी भाजपातच होते व सर्वांचे विचार आधीपासून भाजपाशी जुळत असल्याने त्यांनाही भाजपा सोडून करमत नव्हते. राष्ट्रवादी पक्षात काम करणेही वा त्या पक्षाच्या विचारधारेशी त्यांची मत जुळत नसल्याने त्यांनी पुन्हा भाजपात परतण्याचा निर्णय घेतला. सर्वांना सोबत घेवूनही शहराचा विकास साधण्यात येईल, असे आमदार संजय सावकारे यांनी सांगितले.
