जळगाव (प्रतिनिधी) राष्ट्रवादी काँग्रेसचे ज्येष्ठ नेते, आमदार एकनाथराव खडसे यांना हृदयविकाराचा झटका आला आहे. त्यांच्यावर सध्या जळगावमध्ये उपचार सुरू आहेत. दरम्यान, पुढील उपचारासाठी खडसेंना मुंबईत हलविण्यात येणार आहे. त्यासाठी मुख्यमंत्री एकनाथ शिंदे यांनी तातडीनं एअर अ‍ॅम्बुलन्सची व्यवस्था केली आहे.
राष्ट्रवादी काँग्रेसचे आमदार आणि ज्येष्ठ नेते एकनाथराव खडसे यांना हृदयविकाराचा झटका आल्याची माहिती समोर येत आहे. मुख्यमंत्री एकनाथ शिंदे यांना याबाबत माहिती मिळताच त्यांनी खडसे यांच्यासाठी एअर एम्ब्युलन्सची व्यवस्था करण्याचे आदेश दिले आहेत. दुपारच्या सुमारास खडसे यांना छातीमध्ये दुखू लागलं होतं. त्यामुळे त्यांना हॉस्पिटलमध्ये दाखल करण्यात आले. त्यांना सौम्य हृदयविकाराचा झटका आल्याचे कळते. त्यानंतर त्यांना त्वरित स्थानिक रुग्णालयात दाखल करण्यात आलं. आता हवाई रुग्णवाहिकेतून त्यांना मुंबईत नेलं जाणार आहे.
जळगाव येथे एकनाथराव खडसे यांच्यावर उपचार करणारे डॉ. विवेक चौधरी यांनी ‘माध्यमांसोबत बोलतांना सांगितले की, खडसे यांना दोन दिवसांपासून अस्वस्थ वाटत होते. छातीत दुखणे आणि खोकला सुरू होता. त्यांची प्रकृती सध्या स्थिर आहे. मधुमेह आणि इतर जुने आजार आहेत. सध्या त्यांच्यावर प्राथमिक उपचार सुरू आहेत. संध्याकाळी पुढील उपचारासाठी त्यांना मुंबईतील बॉम्बे हॉस्पिटलमध्ये दाखल करण्यात येणार आहे.
