जळगाव (प्रतिनिधी) केंद्र सरकार तथा ईडी विरोधात घोषणाबाजी करत जळगावमध्ये आज जयंत पाटील यांच्याविरोधात ईडीकडून सुरु असलेल्या चौकशीचा निषेध नोंदवण्यात आला. ईडीचा गैरवापर असाच सुरु राहिल्यास येत्या काळात आम्ही महाराष्ट्रभर रस्त्यावर उतरु असा इशारा राष्ट्रवादी काँग्रेसकडून केंद्र सरकारला देण्यात आला आहे.
ईडीचा गैरवापर करुन जयंत पाटील यांची नाहक बदनामी केली जात असल्याचा आरोप करत जळगावात राष्ट्रवादी काँग्रेस आक्रमक झाल्याचे पाहायला मिळाले. यावेळी जिल्हाधिकारी कार्यालयाबाहेर हातात निषेधाचा फलक घेऊन निदर्शने करण्यात आली. राष्ट्रवादी कॉंग्रेसचे प्रदेशाध्यक्ष जयंत पाटील यांच्या ईडी चौकशीविरोधात राष्ट्रवादीचे जिल्हाध्यक्ष अॅड.रवींद्र पाटील यांच्या नेतृत्वात जिल्हाधिकारी कार्यालयाबाहेर जोरदार आंदोलन करण्यात आले. निवडणुका डोळ्यासमोर ठेवून इडीचा धाक दाखवून दबावतंत्राचा वापर करण्यात येत आहे. सरकारच्या या दबावतंत्राचा राष्ट्रवादी तीव्र शब्दात त्यांनी केंद्र सरकारचा निषेध व्यक्त केला.
यावेळी जयंत पाटील यांच्यावर इडीच्या चौकशीच्या निषेधार्थ राष्ट्रवादीने जिल्हाधिकाऱ्यांना निवेदन दिले. एजाज मलिक, महानगराध्यक्ष अशोक लाडवंजारी, मंगला पाटील, रिकू चौधरी, सुनील माळी, कल्पना पाटील, स्लिम इनामदार, योगेश देसले यांच्यासह पदाधिकारी उपस्थित होते. यावेळी केंद्र व राज्य सरकारच्या विरोधात घोषणाबाजी करण्यात आली.
