नवी दिल्ली (वृत्तसंस्था) टोकयो ऑलिम्पिक्समध्ये भारताला सुवर्णपदक मिळवलेला नीरज चोप्राने नुकताच आपला एक व्हिडिओ ट्विट केला असून त्याने या व्हिडिओमध्ये आपल्या वक्तव्याचा गैरवापर करणाऱ्यांना चांगलेच झापले आहे. तुमच्या घाणेरड्या अजेंड्यासाठी माझ्या वक्तव्यांना वापरु नका, असे त्याने सुनावले आहे.
आपल्या ट्विटमध्ये तो म्हणतो, माझी आपल्या सर्वांना विनंती आहे की माझ्या वक्तव्यांचा वापर आपल्या घाणेरड्या अजेंड्याचा प्रसार करण्यासाठी करु नये. खेळ आपल्या सर्वांना एकत्र राहायला शिकवतो. कमेंट्स करण्याआधी खेळाचे नियम समजून घ्या.
या ट्विटसोबत त्याने एक व्हिडिओही शेअर केला आहे. या व्हिडिओमध्ये आपल्याला पाठिंबा दिल्याबद्दल त्याने देशवासीयांचे आभार मानले आहेत. आपल्या व्हिडिओमध्ये पुढे तो म्हणतो, “मी मागे एका मुलाखतीत सांगितलं होतं, की खेळाच्या वेळी भाला फेकण्यासाठी मी पाकिस्तानी खेळाडू नदीमकडून भाला घेतला. पण त्याला फार मोठा मुद्दा बनवण्यात आलं. खरंतर ही खूप साधी गोष्ट आहे. आपल्या व्यक्तिगत भाल्याचा वापर सर्व खेळाडू करु शकतात. तसा नियमच आहे. त्यामुळे त्यात काही मोठी गोष्ट नाही. तो भाला घेऊन नदीम तयारी करत होता आणि माझ्या खेळावेळी मी त्याला तो भाला मागितला. यात काहीही वेगळं नाही. पण माझ्या माध्यमातून काही लोक हा खूप मोठा मुद्दा बनवत आहे. त्या सर्वांना माझी विनंती आहे की असं काही करु नका.”
नीरजने ऑलिम्पिकचा किस्सा ‘टाइम्स ऑफ इंडिया’ला दिलेल्या मुलाखतीमध्ये सांगितला होता. तो म्हणाला होता, ”मी फायनल सुरू होण्यापूर्वी माझा भाला शोधत होतो. मला तो मिळत नव्हता. अचानक मला अर्शद नदीम माझा भाला घेऊन चालताना दिसला. मी त्याला म्हणालो, ”भाऊ हा माझा भाला आहे, मला दे. मला आता तो फेकायचा आहे. मग त्याने तो मला परत दिला. या सर्व प्रकारामुळे माझ्या पहिल्या थ्रोवर परिणाम झाला. मी पहिला थ्रो घाईमध्ये फेकला होता.’ असा अनुभव नीरजनं सांगितला आहे. अर्शद नदीम हा पाकिस्तानचा भालाफेकपटू आहे. तो देखील टोकयो ऑलिम्पिकमध्ये फायनलसाठी पात्र झाला होता. ऑलिम्पिक फायनल खेळणारा तो पाकिस्तानचा पहिलाच भालाफेकपटू आहे. त्याला मेडल मिळवण्यात मात्र अपयश आले. तो फायनलमध्ये पाचव्या क्रमांकावर होता.
