नवी दिल्ली (वृत्तसंस्था) ब्रिटनमधून भारतात आलेल्या सहा प्रवाशांना कोरोनाच्या नवीन विषाणूंची लागण झाल्याचे चाचण्यांमधून निष्पन्न झाले आहे. हा नवीन विषाणू आधी पेक्षा तब्बल ७० टक्के अधिक घातक असल्याने आरोग्य यंत्रणा सतर्क झाल्या आहेत. तसेच या सहा जणांना स्वतंत्र खोलीत आयसोलेट केलं आहे.
भारतात कोरोनाव्हायरसच्या नव्या स्ट्रेनने बाधित एकूण सहा जण आढळले आहेत. भारत सरकारने याबाबत माहिती दिली आहे. युनायटेड किंग्डममधून परतलेल्या सहा जणांमध्ये कोरोनाचा नवीन जिनोम आढळला आहे. विशेष म्हणजे सध्यातरी एकही रुग्ण महाराष्ट्रातील नसून देशाच्या अन्य भागातील आहे. सहापैकी तीन जणांचे नमुने बंगळुरुच्या निमहंसमध्ये, दोघांचे हैदराबादच्या सीसीएमबी आणि चेन्नईतील रुग्णाचा नमुना पुण्याच्या एनआयव्हीमध्ये तपासणीसाठी पाठवण्यात आले होते. त्याच्या अहवालातून ही चिंताजनक माहिती समोर आली आहे. आरोग्य मंत्रालयाच्या माहितीनुसार, ब्रिटनमधून परतलेले हे सहा जण यूकेमध्ये आढळलेल्या सार्स कोवि-२ च्या नवे स्ट्रेनने संक्रमित आहेत. संबंधित राज्य सरकारांनी तयार केलेल्या विलगीकरण कक्षात या सहा जणांना ठेवलं आहे. याशिवाय त्यांच्या कुटुंबीयांना तसंच त्यांच्या संपर्कातील लोकांना क्वारन्टीन करण्यात आलं आहे. तर इतर प्रवाशांची माहिती घेतली जात आहे. २५ नोव्हेंबरपासून २३ डिसेंबर दरम्यान, जवळपास ३३ हजार प्रवासी यूकेहून भारताच्या विविध विमानतळावर पोहोचले. या सर्व प्रवाशांचा राज्य सरकार आणि केंद्रशासित प्रदेशांकडून आरटी-पीसीआर चाचणी करुन त्यांची नोंद ठेवली जात आहे. आतापर्यंत ११४ जण कोरोना पॉझिटिव्ह आढळले आहेत. त्यांचे नमुने देशातील ही दहा प्रयोगशाळांमध्ये (एनआयबीएमजी कोलकाता, आयएलएस भुवनेश्वर, एनआव्ही पुणे, सीसीएस पुणे, सीसीएमबी हैदराबाद, सीडीएफडी हैदराबाद, इन्स्टेम बंगळुरु, एआयएमएचएएनएस बंगळुरु, आयजीआयबी दिल्ली, एनसीडीसी दिल्ली) पाठवण्यात आले आहेत. अशी माहिती आरोग्य मंत्रालयाने दिली आहे.
दरम्यान, कोरोनाव्हायरसाचा नवा स्ट्रेन ७० टक्के वेगाने परसतो. त्यामुळे याबाबत अतिशय सतर्कता बाळगली आहे, असं वैज्ञानिकांनी ब्रिटनमध्ये आढळलेल्या कोरोनाच्या नव्या स्ट्रेनबद्दल सांगितलं होतं. ज्या कंपन्या कोरोनाची लस तयार करत आहेत त्यांनी दावा केला आहे की, कोरोनाव्हायरसच्या नव्या स्ट्रेनचा लसीच्या निर्मितीवर परिणाम होणार नाही.
