पुणे (वृत्तसंस्था) राज्यात नवीन व्हेरिएंट रोखण्यासाठी तयारी सुरु झाली आहे. पुण्यातील कोरोना परिस्थितीबाबत उपमुख्यमंत्री अजित पवार यांनी माहिती दिली आहे. निर्बंध घालावे लागू शकतात, तसंच परिस्थिती पाहून पुढील उपाययोजना आखल्या जातील असं पवार यांनी म्हटलं आहे.
पुण्यातील कोरोना परिस्थितीबाबत सांगताना अजित पवार म्हणाले,’सध्या पुण्यातील परिस्थिती बरी आहे, पण जागतिक पातळीवर नवीन व्हेरियंट पसरतोय. त्यामुळे यावर उपाययोजना म्हणून भविष्यात नव्याने काही बंधने घालावी लागू शकतात, असं तज्ज्ञांचंही मत आहे.’
राज्याचे मुख्यमंत्री कोरोना परिस्थितीबाबत राज्यातील सर्व जिल्हाधाकार्यांची ऑनलाइन बैठक घेत असल्याचं पवारांनी सांगितलं. तसचं परदेशातून येणाऱ्या विमानांबाबत मुख्यमंत्री पंतप्रधानांसोबत होणाऱ्या ऑनलाइन बैठकीत प्रश्न उपस्थित करणार आहे. तसंच सध्यातरी विमान प्रवास करणाऱ्या डोमेस्टिक ट्रॅव्हलर्सवर कोणतेही बंधने नसून आंतरराष्ट्रीय प्रवाशांवर केंद्र सरकारच्या सूचनांनुसार बंधने येतील, असं पवार म्हणाले.
पुणे जिल्ह्यातील करमणूकीच्या कार्यक्रमांबाबतही पवारांनी भाष्य केलं. पुण्यात कोरोनाची परिस्थिती सध्या नियंत्रणात असल्याने १ डिसेंबरपासून सिनेमागृह, नाट्यगृह पूर्ण क्षमतेने सुरु करणार असल्याचं पवार यांनी सांगितलं. तसंच भिमथडी जत्रेला डिसेंबरच्या चौथ्या आठवड्यात परवानगी देण्यात आली असून सवाई गंधर्व संगीत महोत्सवासारखे कार्यक्रमही सर्व नियमांचे पालन करून होणार असल्याचंही ते म्हणाले.
