मॉस्को (वृत्तसंस्था) रशियाने युक्रेनवर हल्ला केलाय. रशियाच्या हल्ल्यामुळे युक्रेनच्या अनेक शहरात भीतीचे वातावरण आहे. रशियाच्या हल्ल्याचा सामना करत असलेल्या युक्रेननं जगभरात राहणाऱ्या आपल्या देशवासियांना भावनिक आवाहन केलंय. ‘रशियानं युक्रेनवर हल्ला केला असला तरी कुणीही पळून जाणार नाही. लष्कर, राजनैतिक अधिकारी सगळे काम करत आहेत, असे आवाहन त्यांनी केले आहे.
रशियाचा युक्रेनवर हल्ला करण्याची भीती आता सत्यात उतरलीय. रशियन सैन्यानं युक्रेनच्या राजधानीला लक्ष्य करत युक्रेनियन सैन्यावर हल्ला चढवला आहे. गुरुवारी सकाळी रशियाचे अध्यक्ष व्लादिमिर पुतीन यांनी युक्रेनच्या लष्कराला शस्त्रास्त्र खाली टाकून शरणागती पत्करण्याचं आवाहन केलं होतं. तसंच लष्करी कारवाईचेही आदेश दिले होते. एवढं मोठं पाऊल उचलूनही युक्रेनवर हल्ला करण्याचा आपला कोणताही हेतू नसल्याचंही वक्तव्य पुतीन यांनी बेधडकपणे केलं.
पुतीन यांच्या वक्तव्याला प्रत्यूत्तर देताना, ‘पुतीन यांनी युक्रेनवर हल्ला चढवत युद्धाला सुरूवात केलीय. युक्रेनच्या शांत शहरांवर हल्ले होत आहेत. हे एक आक्रमक युद्ध आहे. मात्र, या हल्ल्यापासून युक्रेन स्वतःचा बचाव करेल आणि जिंकेलही. जगानं पुतीन यांना थांबवावं. कारवाई करण्याची हीच वेळ आहे’ असं युक्रेनच्या परराष्ट्र मंत्रालयानं ट्विटरवर म्हटलं होतं.
देशाच्या नागरिकांना आवाहन
रशियाच्या हल्ल्याचा सामना करत असलेल्या युक्रेननं जगभरात राहणाऱ्या आपल्या देशवासियांना भावनिक आवाहन केलंय. ‘रशियानं युक्रेनवर हल्ला केला असला तरी कुणीही पळून जाणार नाही. लष्कर, राजनैतिक अधिकारी सगळे काम करत आहेत. युक्रेन लढणार, युक्रेन स्वतःचा बचाव करणार… युद्ध जिंकणार, असा निर्धार युक्रेनचे परराष्ट्रमंत्री दिमित्रो कुलेबा यांनी व्यक्त केलाय. सोबतच, त्यांनी जगभरात राहत असलेल्या युक्रेनच्या जनतेलाही आवाहन केलंय. ‘तुम्ही राहत असलेल्या देशाला पुतीन यांच्या हल्ल्याची सत्यता सांगत राहा आणि तिथल्या सरकारांना त्वरीत कारवाई करण्यास सांगा’ असं आवाहनही कुलेबा यांनी केलंय.
