इंग्लंड (वृत्तसंस्था) शांततेचा नोबेल पुरस्कार जिंकणारी मलाला युसूफझाई लग्नबेडीत अडकली आहे. असेर मलिक नावाच्या तरुणासोबत इंग्लंडमधील बर्मिंगहॅम येथील राहत्या घरी अगदी छोटेखानी हा विवाह सोहळा संपन्न झाला आहे. मलालाने स्वतः ट्विट करुन माहिती दिली आहे. फोटो शेअर करताना मलालाने असं लिहिलं आहे की तिने लग्न केलं आणि ती पुढील आयुष्यासाठी उत्साहित आहे.
आपल्या ट्विटमध्ये मलाला म्हणते की, “आजचा दिवस माझ्या आयुष्यातील मौल्यवान दिवस आहे. असेर आणि मी आयुष्यभर भागीदार होण्यासाठी गाठ बांधली. बर्मिंगहॅममध्ये आम्ही आमच्या कुटुंबियांसोबत एक छोटेखानी निकाह समारंभ साजरा केला. कृपया आम्हाला तुमच्या प्रार्थना पाठवा. पुढच्या प्रवासासाठी आम्ही एकत्र चालण्यास उत्सुक आहोत.” असं ट्विट करत मलालाने आपल्या भावना व्यक्त केल्या आहेत.
कोण आहे मलाला युसुफझाई?
मलाला युसुफझाई ही मुलींच्या शिक्षणासाठी झटणारी एक पाकिस्तानी कार्यकर्ता आणि इतिहासातील सर्वात तरुण नोबेल शांतता पुरस्कार विजेती आहे. तिने पाकिस्तानमध्ये मुलींच्या शिक्षणासाठी आणि शांततेसाठी आवाज उठवल्याबद्दल ९ ऑक्टोबर २०१२ रोजी तालिबानने मलालावर गोळ्या झाडल्या होत्या, त्यावेळी मलाला केवळ १५ वर्षांची होती. यावेळी दहशतवाद्यांनी थेट मलालावर गोळी झाडली जी तिच्या डोक्यात लागली. त्यानंतर पाकिस्तानातून इंग्लंडमध्ये तिच्यावर अनेक महिने उपचार केल्यानंतर ती मृत्यूत्या दारातून परत आली. मलालावर तालिबानी दहशतवाद्यांनी केलेल्या हल्ल्याचा आंतरराष्ट्रीय स्तरावरूनही जाहीर निषेध करण्यात आला. या हल्ल्याच्या निषेधार्थ जगभरातील लोकांनी मलालाला पाठिंबा दिला.
यानंतर मलालाने मागे वळून पाहिले नाही आणि तालिबानच्या हल्ल्याला पराभूत करून महिलांचा आवाज जगासमोर बुलंद करणारी महिला म्हणून ती नावारुपास आली. २०१४ मध्ये मलालाला शांततेचा नोबेल पुरस्कार मिळाला होता. मलाला वयाच्या १७ व्या वर्षी सर्वात तरुण नोबेल विजेती आहे. विशेष म्हणजे भारताच्या कैलाश सत्यार्थी यांनाही याच वर्षी नोबल पुरस्कार देण्यात आला होता.
