धुळे (प्रतिनिधी) महाराष्ट्रात विविध ठिकाणी ओमायक्रॉन संसर्ग झालेले रुग्ण आढळून आल्याने प्रशासनाची झोप उडाली आहे. विविध जिल्ह्याच्या ठिकाणीही खबरदारी घेतली जात आहे. यातच आता धुळे जिल्ह्यात परदेशातून आलेल्या ११८ नागरिकांपैकी ८८ नागरिकांचा संपर्क झाला आहे.
ओमायक्रॉन या कोरोनाच्या नव्या व्हेरियंटचा वाढता प्रादुर्भाव लक्षात घेता जिल्हा प्रशासनातर्फे परदेशातून आलेल्या नागरिकांशी संपर्क साधून कोरोना तपासणी करण्याचे आदेश देण्यात आले आहेत. यानंतर धुळे जिल्ह्यामध्ये आज अखेरपर्यंत ११८ नागरिक परदेशातून आले असल्याची माहिती प्रशासनाला मिळाली असून यापैकी जवळपास ८८ नागरिकांशी प्रशासनातर्फे संपर्क करण्यात आला आहे. त्यापैकी ७१ नागरिकांची आरटीपीसीआर तपासणी आरोग्य विभागातर्फे करण्यात आली आहे.
परदेशातून धुळ्यात आलेल्या उर्वरित ३० नागरिकांचा युद्धपातळीवर प्रशासनातर्फे शोध घेण्यात येत आहे. अद्यापपर्यंत परदेशातून आलेल्या कुठल्याही नागरिकाचा कोरोना तपासणीचा अहवाल पॉझिटिव्ह आला नसल्याचे आरोग्य विभागाचे नोडल अधिकारी विशाल पाटील यांनी सांगितले.
