चोपडा (प्रतिनिधी) चोपडा व अमळनेर येथील कोळी लोकांना एसटीचे दाखले मिळाले पाहिजेत, यासाठी दि.९ ऑगस्ट रोजी आदिवासी व क्रांती दिवसापासून चोपडा येथील प्रांत व तहसिल कार्यालयासमोर आदिवासी कोळी जमातीतर्फे शांतता कायदा व सुव्यवस्था राखून तीव्र अन्नत्याग सत्याग्रह, धरणे आंदोलन, ठिय्या आंदोलन, रास्तारोको आंदोलन, लाक्षणिक उपोषण करण्यात येऊन शालेय विद्यार्थ्यांचा मोर्चाही काढण्यात येणार आहे.
अमळनेर व चोपडा तालुक्यातील आदिवासी कोळी लोकांना टोकरेकोळी (एसटी) चे दाखले सुलभपणे मिळावेत, यासाठी आदिवासी कोळी समाजाचे नेते जगन्नाथ बाविस्कर (गोरगावले बुद्रुक) यांनी कोळी समाजाच्या सर्व संघटनांना सोबत घेऊन दि. ८ मे २०२३ रोजी अमळनेर प्रांत कार्यालयासमोर पाच दिवसांचा तीव्र अन्नत्याग सत्याग्रह करून शेकडों दाखले मिळवून दिले होते. तद्नंतर तेथील प्रांताधिकारी यांची बदली झाल्याने तेथे नवीन हजर झालेले प्रांताधिकारी यांनी कोळी लोकांना तसे दाखले देणे बंद केले आहे. तसेच चोपडा येथे नवीन प्रांत कार्यालय स्थापन झाल्याने येथीलही प्रांताधिकारी कोळी लोकांना तसे दाखले देण्यास टाळाटाळ करीत आहेत.
घटनादत्त अधिकारानुसार शासनाचे निर्णय जीआर असून राजकारण्यांच्या दबावापोटी प्रशासन आदिवासी कोळी जमातीला वेठीस धरत आहे. हे दाखले मिळत नसल्याने कोळी समाजातील सुशिक्षीत युवकांचे नोकरीविषयक व शालेय मुलामुलींचे शैक्षणिक नुकसान होत आहे. म्हणून चोपडा व अमळनेर येथील कोळी लोकांना एसटीचे दाखले मिळाले पाहिजेत, यासाठी दि.९ ऑगस्ट रोजी आदिवासी व क्रांती दिवस असल्याने त्याचदिवशी स.११ वाजेपासून चोपडा येथील प्रांत व तहसिल कार्यालयासमोर आदिवासी कोळी जमातीतर्फे शांतता कायदा व सुव्यवस्था राखुन तीव्र अन्नत्याग सत्याग्रह, धरणे आंदोलन, ठिय्या आंदोलन, रास्तारोको आंदोलन, लाक्षणिक उपोषण करण्यात येऊन शालेय विद्यार्थ्यांचा मोर्चाही काढण्यात येणार आहे. याप्रसंगी तालुक्यातील शेकडों विद्यार्थी, महिलामंडळ, वयोवृद्ध मंडळी तसेच जिल्ह्यातील आदिवासी कोळी समाज संघटनांचे पदाधिकारी व कार्यकर्ते मोठ्ठया संख्येने सहभागी होणार आहेत.
याबाबतचे निवेदन जिल्हाधिकारी, जिल्हा पोलीस अधिकारी जळगाव तसेच प्रांताधिकारी, तहसीलदार, पोलिस अधिकारी चोपडा यांना देण्यात आले आहे. ह्या निवेदनावर आदिवासी टोकरेकोळी समाजाचे पदाधिकारी शांताराम सपकाळे, छगन देवराज, जगन्नाथ बाविस्कर, कैलास सोनवणे, भरत बाविस्कर, कैलास बाविस्कर, मोतीलाल रायसिंग, गव्हरलाल बाविस्कर, पंकज रायसिंग, अनिल कोळी, विशालराज बाविस्कर, रामचंद्र कोळी, गोपाल कोळी, रतिलाल बाविस्कर, सतीश ठाकरे, प्रशांत सोनवणे, समाधान बाविस्कर, सुनील कोळी, देवरथ कोळी, साहेबराव बाविस्कर, संतोष देवराज यांच्या स्वाक्षऱ्या आहेत.
