जळगाव (प्रतिनिधी) माजी जलसंपदामंत्री तथा आमदार गिरीश महाजन यांनी राष्ट्रवादीचे ज्येष्ठ नेते एकनाथराव खडसे यांच्यावर निशाणा साधला आहे. एकनाथ खडसे यांची स्थिती अतिशय केविलवाणी झाली असून ते माझ्या बाबत जे काही बोलतात त्याचा मला राग येत नाही उलट खडसेंची कीव वाटते, असं महाजन म्हणाले.
जामनेर येथे गिरीश महाजन यांनी जामनेर पत्रकार परिषदेचे आयोजन केले होते. यावेळी बोलताना ते म्हणाले की, आम्ही निवडणुकीवेळी चार चार महीने मतदार संघाच्या बाहेर असुनही ४० हजार मतांनी निवडून आलो. मात्र खुद्द एकनाथराव खडसे व त्यांचे सर्व सहकारी निवडणुकीवेळी मुक्ताईनगरमध्ये उपस्थित असूनही त्यांना निवडणूक जिंकता आली नाही. ज्याप्रकारे खडसे यांनी मुक्ताईनगर विधानसभेतील विकास केला आहे त्यामुळे त्यांचा पराभव झाला.
गिरीश महाजन पुढे म्हणाले की, खडसे असे म्हणतात की मी बीएचआर बाहेर काढला म्हणून माझ्यावर ईडी लावली. बीएचआर प्रकरण ४ महिन्यापूर्वीच बाहेर आले आहे. आरोपी गजाआड आहेत. त्यांचे जावई चार महिन्यापासून जेलमध्ये आहेत. मंदाताई यांनादेखील नोटीस बजावली आहे. मात्र मी किती धुतल्या तांदळाचा हे दाखवण्यासाठी ते असे वक्तव्य करत आहेत. मंत्री बनायला गेले आता साधे आमदारही नाही.
