धरणगाव (प्रतिनिधी) माझी वसुंधरा अभियान ६.० व स्वच्छ भारत अभियान (नागरी) २.० अंतर्गत केंद्रीय गृहनिर्माण तथा शहरी कार्य मंत्रालय भारत सरकार, व पर्यावरण व वातावरणीय बदल विभाग यांच्या मार्फत दि.२२ मे ते ५ जून २०२५ या कालावधीत “जागतिक स्तरावर प्लास्टिक प्रदूषणाचे निर्मूलन” मोहीम राबविण्याबाबत निर्देशित करण्यात आले असून धरणगाव नगरपरिषदेमार्फत भव्य वृक्षारोपण कार्यक्रमाचे आयोजन करण्यात आले.
दि. ५ जून २०२५ रोजी जागतिक पर्यावरण दिनाचे औचित्य साधून जीएस नगर, गांधी मळा तसेच दादाजी कुटीया चोपडा रोड येथील ओपन प्लेस येथे वृक्षारोपण करण्यात आले. याप्रसंगी उपस्थित नागरिकांसह हरित शपथ घेण्यात आली. यावेळी मुख्याधिकारी रामनिवास झंवर तसेच नगरपरिषदेचे सर्व अधिकारी व कर्मचारी उपस्थित होते. कार्यक्रमा दरम्यान उपस्थित नागरिकांना पर्यावरण संवर्धन करणे, झाडे लावणे, त्यांचे संगोपन करणे याबाबत माहिती देण्यात आली.
तसेच जागतिक पर्यावरण दिनानिमित्त प्लास्टिक प्रदूषणाचे निर्मूलन या संकल्पनेंतर्गत धरणगाव नगरपरिषदेचा वतीने शहरात प्लॅस्टिक पिशवीला पर्याय कापडी पिशवी वाटप तसेच प्लॅस्टिक बंदीबाबत कारवाई करण्यात आली. यात शहरातील विविध दुकानांची नगरपरिषदेच्या पथकातर्फे तपासणी करण्यात आली. ३ दुकानांना दुसरी वेळ असल्याने प्रत्येकी १०,०००/- तसेच ७ दुकानदारांना प्रत्येकी ५०००/- रुपये याप्रमाणे एकूण ६७,०००/- रुपये दंड करण्यात येवून वसूल करण्यात आला. तसेच १०० किलो प्लॅस्टिक देखील जप्त करण्यात आले. सदरची मोहीम मुख्याधिकारी रामनिवास झंवर यांच्या मार्गदर्शनाखाली तसेच स्वच्छता निरीक्षक हैबतराव पाटील व संतोष बिऱ्हाडे यांच्या नेतृत्वाखाली मुकादम शेख शमशोध्दीन, रामकृष्ण माळी, अण्णा माळी, सागर पचेरवार, शुभम पचेरवा यांच्या पथकाने ही राबविली.
सदर कार्यक्रमादरम्यान केवळ या एका दिवसाने प्लास्टिक प्रदूषणाचा प्रश्न संपणार नाही. प्लास्टिक प्रदूषण हा आपल्या पर्यावरणासाठी, जैवविविधतेसाठी आणि मानवी आरोग्यासाठी मोठा धोका ठरत आहे. त्यामुळे आपल्या जीवनशैलीत बदल घडवून आणणे, प्लास्टिकचा वापर कमी करणे आणि त्याचे योग्य व्यवस्थापन करणे आवश्यक आहे. त्यासाठी शहरातील प्रत्येक नागरिकाने जास्तीत – जास्त प्रमाणात वृक्षारोपण करून त्याचे संगोपन करणे गरजेचे आहे. असे केल्यास आपण हवामान बदलाचा प्रतिकार करू शकतो आणि जैवविविधतेचा ऱ्हास थांबवू शकतो असे प्रतिपादन मुख्याधिकारी रामनिवास झंवर यांनी केले.
