अमळनेर (प्रतिनिधी) तालुक्यातील पाडळसरे येथून जवळच असलेल्या मालपूर येथील एका ४७ वर्षीय प्रौढाचा अंतुर्ली रस्त्यावर शेत शिवारात खून झाल्याची घटना रविवारी रात्री आठ वाजेच्या सुमारास उघडकीस आली. प्रभाकर विनायक पाटील (वय ४६ रा. मालुपर ता. अमळनेर), असे मृत इसमाचे नाव आहे.
याबाबत उज्वलाबाई प्रभाकर पाटील (वय ३५ धंदा रा. शेती मालपुर ता. अमळनेर) यांनी दिलेल्या फिर्यादीत म्हटले आहे की, दि. १९ रोजी दुपारी साडेचार ते साडेपाच वाजेच्या सुमारास मालुपर शिवारात त्यांचे पती प्रभाकर पाटील हे शेतात जाणारे गाड रस्त्यावर मुरुम टाकण्याचे काम करत होते. यावेळी मुरुम टाकण्याचे कारणावरुन व जुने भांडणाचे कारणावरुन गावातील ज्ञानेश्वर लहु पाटील, राजेंद्र लहु पाटील, दिलबर लहु पाटील, रुपेश ज्ञानेश्वर पाटील, शिवाजी भगवान पवार, लहु यादव पाटील, सुनंदा राजेंद्र पाटील, निर्जला राजेंद्र पाटील, अशांनी माझे पती प्रभाकर पाटील यांना लाकडी काठ्यांनी मारहाण करुन गंभीर दुखापती करुन त्यांना जिवे ठार केले,असे उज्वलाबाई पाटील यांनी आपल्या फिर्यादीत म्हटले आहे.
घटनेची माहिती मिळताच घटनास्थळी लागलीच पोलिसांनी धाव घेत मृतदेह रात्री ९. ३० वाजता मृतदेह ग्रामीण रुग्णालयात हलवला. घटनास्थळी डीवायएसपी सुनील नंदवाळकर, सहा पोलीस निरीक्षक शीतलकुमार नाईक, पोलीस उपनिरीक्षक विनोद पाटील यांनी भेट दिली. दरम्यान पोलिसांचे पथक रात्रभर घटनास्थळी थांबून होते.
