नाशिक (वृत्तसंस्था) संसर्गजन्य आजारात वैयक्तीक स्वच्छतेचे महत्व वाढावे तसेच सामाजिक आरोग्य सुदृढ रहावे यासाठी समाजात कोविड-१९ संदर्भात जनजागृती होणे गरजेचे आहे. या अनुषंगाने महाराष्ट्र आरोग्य विज्ञान विद्यापीठापीठातर्फे बुधवार, दि. ०५ मे, २०२१ रोजी सकाळी १० वाजता ऑनलाईन कार्यशाळेचे आयोजन करण्यात आले आहे.
या कार्यशाळेस जेष्ठ समाजसेवक डॉ. भरत वाटवाणी, सुप्रसिध्द हृदयरोगतज्ज्ञ डॉ. विजय सुरासे, मा. प्रभारी कुलगुरु डॉ. नितीन करमाळकर, कुलसचिव डॉ. कालिदास चव्हाण, विद्यार्थी कल्याण विभागाचे संचालक संदीप कुलकर्णी आदी मान्यवर ऑनलाईन उपस्थित राहणार आहेत.
विद्यापीठाचे कुलसचिव डॉ. कालिदास चव्हाण यांनी सांगितले की, सध्या कोविड-१९ आजाराचा प्रादुर्भाव मोठया प्रमाणात वाढला असल्याचे निदर्शनास येते. कोविड-१९ आजाराचा प्रादुर्भाव कमी करण्यासाठी वैयक्तीक स्वच्छता व सामाजिक जनजागृती करण्यासाठी या ऑनलाईन कार्यशाळेत तज्ज्ञ मार्गदर्शन करणार आहेत. सदर कार्यशाळेचे ऑनलाईन कार्यशाळेचे प्रसारण यु-टयुब चॅनेलव्दारा करण्यात येणार असल्याचे त्यांनी सांगितले.
या कार्यशाळेत रॅमन मॅगासेस पुरस्कार विजेते, ज्येष्ठ समाजसेवक डॉ. भरत वाटवाणी ’वैद्यकीय विद्यार्थ्यांचे समाजभान’ या विषयावर तसेच सुप्रसिध्द हृदयरोगतज्ज्ञ डॉ. विजय सुरासे ’संकटकाळ- संयमाने भविष्याकडे’ या विषयावर मार्गदर्शन करणार आहेत.
या कार्यशाळेत विद्यापीठाचे जनसंपर्क अधिकारी डॉ. स्वप्नील तोरणे संवादक असणार आहे. के.ई.एम.रुग्णालयातील फॉरेन्सिक मेडिसिन आणि टॉक्सिकोलॉजी विभागाचे प्रमुख डॉ. रविद्र देवकर कार्यशाळेचे समन्वयन करणार आहेत. विद्यापीठातर्फे आयोजित ऑनलाईन कार्यशाळेचे प्रसारण https://youtu.be/cexChZa5AIg या यु-टयुब लिंकद्वारा प्रसारित करण्यात येणार आहे. सदर कार्यशाळा आरोग्य क्षेत्रातील मान्यवर, अभ्यागत, अधिष्ठाता, प्राचार्य, महाविद्यालय प्रमुख, सर्व संलग्नित महाविद्यालयातील विद्यार्थी व शिक्षकांनी ऑनलाईन पहावा असे विद्यापीठाकडून संलग्नित महाविद्यालयांना कळविण्यात आले आहे. कोविड-१९ संदर्भात जनजागृती विषयी कार्यशाळेत तज्ज्ञांनी केलेले मार्गदर्शन विद्यार्थी व अभ्यागतांनी घ्यावे, असे आवाहन विद्यापीठातर्फे करण्यात आले आहे.