बोदवड (प्रतिनिधी) बोदवड तालुका मराठा सेवा संघ व सकल मराठा समाजाचे वतीने आज पोलीस निरीक्षक किरणकुमार बकाले यांचा निषेध करण्यात येऊन सेवेतून बडतर्फ करण्यात यावे, अशी मागणी तहसील कार्यालयात निवेदनाद्वारे केली आहे.
या निवेदनात असे नमूद केले आहे की, पोलीस दलातील प्रतिष्ठेच्या समजल्या जाणाऱ्या (एलसीबी) स्थानिक गुन्हे शाखेचे पोलीस निरीक्षक किरणकुमार बकाले यांनी मराठा समाजाबद्दल व महिलांबद्दल अतिशय घाणेरड्या स्वरुपाचे आक्षेपार्ह वक्तव्य केलेले असून त्याबाबतची दिनांक १३ सप्टेंबर रोजी ऑडीओ क्लिप व्हायरल झालेली असून एका पोलीस निरीक्षक अशा महत्वाच्या व प्रतिष्ठेच्या पदावर नियुक्त असतांना एखाद्या समाजाबद्दल बेताल वक्तव्य करुन संपूर्ण समाजाच्या भावना दुखविलेल्या आहेत. तरी एखाद्या जबाबदार अधिकाऱ्याच्या मनात जर एखाद्या समाजाबद्दल इतका द्वेष, राग राहत असेल तर अशा अधिकाऱ्यांकडून सामाजीक न्यायाची, सुव्यवस्थेची काय अपेक्षा करता येईल. एवढ्या मोठ्या पदावरील जबाबदार व्यक्तिने सामाजिक कायदा व सुव्यवस्था राखणे हे त्यांचे कर्तव्य असतांना त्यांनी समाजा समाजामध्ये तेढ निर्माण करुन कायद्याची स्वतः पायमल्लीच केलेली असून आपल्या पदाचा दुरुपयोग केलेला आहे. असा पोलीस अधिकारी जो एखाद्या समाजाच्या विरोधात आहे. त्याच्याकडून सद्रक्षणाय खलनिग्रहणाय या ब्रिद वाक्याची पुर्तता होणे शक्य नाही. तरी सदर पोलीस निरीक्षक किरणकुमार बकाले हे पोलीस म्हणून जिथे कुठे कार्य करतील तिथे मराठा समाजाबद्दल त्यांच्या मनात आकस, द्वेष कायम राहील. त्यामुळे अशी व्यक्ति महत्वाच्या पदावर राहण्यास लायक नाही.
त्यामुळे अशा पोलीस अधिकाऱ्यांची फक्त बदली करुन काहीही होणार नाही. तरी पोलीस निरीक्षक किरणकुमार बकाले यांना व त्यांना समर्थन देणारे अशोक महाजन यांना त्वरीत कायम स्वरुपी बडतर्फ करण्यात यावी. महिलां संदर्भात अपशब्द वापरुन सामाजिक भावना दुखविल्या व महाराष्ट्र नागरी सेवा कायद्यातील नियम, अटी व शर्तीचा भंग केला असल्याने त्यांच्याविरुद्ध गुन्हा दाखल करुन कडक कायदेशीर कारवाई करण्यात यावी. अन्यथा मराठा सेवा संघ व सकल मराठा समाजातर्फे तीव्र आंदोलन करण्यात येईल यांची सर्वस्वी जबाबदारी प्रशासनाची राहील याची कृपया नोंद घ्यावी. या निवेदनाच्या प्रती मुख्यमंत्री, गृहमंत्री, पोलीस अधीक्षक ,यांना पाठवण्यात आल्या आहेत.यावेळी जेष्ठ पत्रकार महेंद्र पाटील, मराठा सेवा संघ तालुका अध्यक्ष विलास सटाले,जिजाऊ ब्रिगेडच्या जिल्हा कार्याध्यक्ष रेखाताई ढोले, ॲड.ईश्वर पाटील, संभाजी ब्रिगेडचे संजय पाटील ,अंनता वाघ ,निवृत्ती ढोले, गणेश मुलांडे,शैलेश वराडे, गणेश पाटील, गोपाल पाटील ,संजय वराडे ,निळकंठ पाटील, धनराज पाटील, सतिष पाटील, रविंद्र वाघ, श्रीराम शेळके ,विशाल तांगडे,राजेद्र पाटील ,महेश पाटील, गजानन पाटील यांच्यासह कार्यकर्ते उपस्थित होते.
