अकोला (वृत्तसंस्था) अंध पतीच्या समोरच अंध पत्नीवर अत्याचार केल्याचा धक्कादायक प्रकार घडला आहे. अमरावतीहून मुलीच्या भेटीसाठी दिग्रसला जात असताना मदतीच्या बहाण्याने एका नराधमाने हे पाशवी कृत्य केले. गुलाम रसूल शेख मतीन (वय २६ वर्ष राहणार सज्जाद हुसेन प्लॉट भगतवाडी, अकोला) असं अत्याचार करणाऱ्या व्यक्तीचे नाव आहे.
परतवाडा शहरातील एक अंध दाम्पत्य अकोला जिल्ह्यातील दिग्रसला आपल्या आजीकडे राहत असलेल्या चिमुकलीला भेटायला निघाले होते. हे दोघंही अकोला बसस्थानकावर रात्री आठ वाजता पोहोचले. तेथून ते टॉवर चौकात जवळच असलेल्या जुन्या बसस्थानकावर वाडेगावाची बस पकडण्यासाठी निघाले होते. त्यातच वाडेगावची बस त्या दिवशी नव्हती. तर तिकडे दिग्रसमध्ये पाऊस सुरु असलेल्याने दोघांनी रेल्वे स्टेशनवर रात्र काढण्याचा निर्णय घेतला. याचवेळी त्यांनी रेल्वेस्थानकाचा पत्ता आणि रस्ता एका व्यक्तीला विचारला. अन् येथेच त्यांचा घात झाला. गुलाम रसुल नावाच्या या नराधमाने त्यांना रेल्वे स्टेशनवर सोडण्याच्या नावाखाली एका निर्जनस्थळी नेलं.
याठिकाणी नराधमाने हातात चाकू घेऊन तुझ्या पतीला ठार मारून टाकेल, अशी धमकी देत पतीसमोरच १५ ते २० मिनिटाच्या अंतराने तब्बल तीन वेळा महिलेवर अत्याचार केल्याचा आरोप आहे. रात्री साडेअकरा वाजता या दोघांनाही त्याने रेल्वे स्थानक परिसरात सोडून दिले अन् त्यानंतर त्याने तेथून पोबारा केला. अंध दाम्पत्य दिग्रसला दुसऱ्या दिवशी पोहोचले आणि सर्व प्रकार घरच्यांना सांगितला. काल सकाळी पती-पत्नी आणि नातेवाईक सिव्हिल लाइन पोलीस ठाण्यात दाखल झाले आणि घडलेला सर्व प्रकाराची तक्रार नोंदवली.
दरम्यान, घटनेचे गांभीर्य पाहता सिव्हिल पोलीस स्टेशनचे पोलीस निरीक्षक भाऊराव घुगे यांनी बस स्थानक परिसर तसेच जुन्या बस स्थानक परिसरातील सीसीटीव्ही कॅमेऱ्याची तपासणी केली. आणि सीसीटीव्हीच्या आधारावर त्याची ओळख पटली आणि लगेच त्याला अटक केली. गुलाम रसूल शेख मतीन (वय २६ वर्ष राहणार सज्जाद हुसेन प्लॉट भगतवाडी, अकोला) असं अत्याचार करणाऱ्या व्यक्तीचे नाव आहे. पोलिसांनी त्याला तत्काळ अटक केली आहे.
