गोंदिया (वृत्तसंस्था) सड़क अर्जुनी तालुक्यातील एका आश्रमशाळेमध्ये विद्यार्थिनीशी चक्क मुख्याध्यापकानेच अश्लील चाळे केल्याचा संतापजनक प्रकार उघडकीस आला आहे. याप्रकरणी पोलिसांनी तात्काळ गुन्हा दाखल करत आरोपी मुख्याध्यापकाला अटक केली आहे. केदार मार्तंड गहाणे (वय ४७), असे संशयित आरोपी मुख्याध्यापकाचे नाव आहे.
गोंदिया जिल्ह्याच्या सडक अर्जुनी तालुक्यातील एका आदिवासी आश्रमशाळेमध्ये कार्यरत असलेले मुख्याध्यापक गहाणे (४७) याच्यावर डुग्गीपार पोलीस स्टेशनमध्ये गुन्हा दाखल करण्यात आला आहे. मुख्याध्यापकाने आश्रमशाळेतील एका विद्यार्थिनीबरोबर अश्लिल चाळे करतानाचे एक छायाचित्र समाजमाध्यमावर प्रसारित झाले होते. त्या अनुषंगाने माहिती मिळाल्यानंतर शाळा प्रशासनाने ‘या’ मुख्याध्यापकाला निलंबितदेखील केले होते.
तालुक्यातील आदिवासी संघटनेचे पदाधिकारीदेखील त्या ठिकाणी शाळेच्या मुख्याध्यापकाला जाब विचारण्यासाठी गेले होते. या संघटनेच्या मदतीने अखेर पीडित मुलीच्या तक्रारीवरून डुग्गीपार पोलीस स्टेशन येथे मुख्याध्यापक गहाणेविरोधात गुन्हा नोंद करण्यात आला आहे. आरोपीला डुग्गीपार पोलिसांनी अटक केली असून, घटनेचा तपास उपविभागीय पोलीस अधिकारी संकेत देवळेकर करीत आहेत.
पीडित मुलगी सडक अर्जुनी तालुक्यातील एका आदिवासी आश्रमशाळेत शिकत आहे. तक्रारदार विद्यार्थिनीने पोलिसांना सांगितले की, आरोपी मला ऑफिसमध्ये ‘, बोलावून रजिस्टर लिहिण्याच्या बहाण्याने पायाला पाय लावून वाईट उद्देशाने स्पर्श करीत होता. त्याने हा क्रम नियमित सुरू ठेवला होता. पिडीत मुलीच्या तक्रारीवरून डुग्गीपार पोलीस स्थानकात गहाणे यांच्या विरोधात ३५४ अ, ३५४ डी, ५०६ तसेच पोस्को कलम १०,१२ आणि अनुसूचित जाती जमाती कायदा (अँट्रॉसिटी) अन्वये गुन्हा नोंद करण्यात आला आहे. आरोपीला डुग्गीपार पोलिसांनी अटक केली आहे. याप्रकरणाचा तपास उपविभागीय पोलिस अधिकारी संकेत देवळेकर हे करीत आहेत.
