जळगाव (प्रतिनिधी) भारत निवडणूक आयोगाच्या निर्देशानुसार 1 जानेवारी 2021 या अर्हता दिनांकावर आधारीत छायाचित्र मतदार यादीचा विशेष संक्षिप्त पुनरीक्षण कार्यक्रम सुरु करण्यात आलेला आहे. यामध्ये 18-पाचोरा विधानसभा मतदार संघाची प्रारुप मतदार यादी प्रसिध्द करण्यात आलेली असून ती सर्व मतदार केंद्रस्तरीय अधिकारी (बी.एल.ओ) यांच्यामार्फत अवलोकनासाठी जाहीर करण्यात आली आहे.
1 जानेवारी 2021 या दिनांकास 18 वर्ष वय पूर्ण करत असलेले व्यक्ती अथवा यापूर्वीच 18 वर्ष वय पूर्ण होऊनही अद्यापपावेतो मतदार नोंदणी केलेली नाही अशा सर्व नागरीकांना या कार्यक्रमाचा लाभ घेता येईल. यासाठी संबंधित गावातील अथवा यादी भागातील मतदान केंद्रस्तरीय अधिकारी (बी.एल.ओ) यांच्यामार्फत अथवा ऑनलाईन पध्दतीने नमुना-6 अर्ज भरुन पात्र नागरीकांना मतदार नोंदणी करता येते. सदर प्रक्रिया संपूर्णपणे निशुल्क असून नाव नोंदणी नंतर पात्र मतदारांना भारत निवडणूक आयोगामार्फत सुबक, टिकाऊ आणि आकर्षक असे मतदार छायाचित्र ओळाखपत्र (ईपीक) देण्यात येते.
तसेच मतदार म्हणून करावयाच्या नावनोंदणी सोबतच दुबार, मयत, कायमस्वरुपी स्थलांतरीत मतदारांची नावे देखील या मोहिमेमध्ये विहित प्रक्रिया राबवून कमी करण्यात येणार आहेत. तसेच ज्या मतदारांना नावाच्या /छायाचित्राच्या तपशिलात काही बदल करावयाचे असतील त्यांनी नमुना-8 भरुन आवश्यक बदल करणेसाठी अर्ज करावा. तसेच विधानसभा क्षेत्रातील पत्त्यात बदल करावयाचा असल्यास नमुना -8 अ अर्ज भरुन पत्त्यात बदल/दुरुस्ती करुन घेता येते. असे राजेंद्र कचरे, उपविभागीय अधिकारी, पाचोरा भाग पाचोरा तथा मतदार नोंदणी अधिकारी 18-पाचोरा विधानसभा मतदारसंघ यांनी एका प्रसिध्दी पत्रकान्वये कळविले आहे.
