नाशिक (वृत्तसंस्था) शिवसेनेचे माजी आमदार राहिलेले बाळासाहेब सानप हे भाजपमध्ये प्रवेश करणार आहेत. विधानसभेतील विरोधी पक्षनेते देवेंद्र फडणवीस यांच्या उपस्थितीत हा पक्षप्रवेश होणार आहे. शिवसेनेसाठी हा मोठा धक्का मानला जात आहे. तर दुसरीकडे नाशिकमध्ये भाजपची ताकद वाढवण्यासाठी सानप यांना पक्षप्रवेश देत त्यांच्याकडे मोठी जबाबदारीही दिली जाणार असल्याची माहिती सूत्रांनी दिली आहे.
शिवसेनेचे माजी आमदार बाळासाहेब सानप भाजपवासी होत आहेत. त्यानंतर लगेच सानप यांच्या खांद्यावर मोठी जबाबदारी दिली जाण्याची शक्यता आहे. सानप यांच्याकडे प्रदेश उपाध्यक्ष, तर वसंत गीते यांच्याकडे अखिल भारतीय ओबीसी मोर्चाचे उपाध्यक्षपद दिलं जाणार असल्याची माहिती सूत्रांनी दिली आहे. नाशिक महापालिका निवडणुकीच्या तोंडावर भाजपची ताकद वाढवण्यासाठी सानप यांनी गीते यांना मोठ्या जबाबदाऱ्या दिल्या जात असल्याचं कळतंय. बाळासाहेब सानप यांनी दोनच वर्षात पुन्हा पक्ष बदलण्याचा निर्णय घेतला आहे. ग्रामपंचायत निवडणुकीच्या निमित्ताने सानप यांनी भाजपमध्ये प्रवेश करणार असल्याचे निश्चित समजले जात आहे. विशेष म्हणजे, बाळासाहेब सानप यांची पक्ष बदलण्याची आता हॅटट्रिक साधणार आहे. गेल्या दोन वर्षात सानप यांनी ३ पक्ष बदलले आहे. आता पुन्हा एकदा ते भाजपमध्ये प्रवेश करणार आहे. परंतु, दुसरीकडे सारख्या पक्ष बदलणाऱ्या नेत्याला भाजपमध्ये घेऊन काय फायदा होणार आहे, असा नाराजीचा सूर भाजपच्या कार्यकर्त्यांनी लगावला आहे. एवढंट नाहीतर सानप यांना पक्षात घेऊ नये म्हणून भाजपचा एक गट चंद्रकांत पाटील यांच्याकडे मागणी करत आहे. पण आगामी नाशिक महापालिका निवडणुकीमध्ये सानप यांचा फायदा होईल, असं सांगत सानप यांच्या भाजप प्रवेशाला वरिष्ठ नेत्यांनीच हिरवा कंदील दिला आहे. सानप हे नाशिक पालिकेत महापौर राहिले होते. भाजपकडून त्यांनी महापौरपद पटकावले होते. त्यानंतर २०१४ च्या विधानसभा निवडणुकीत विधानसभा लढवली होती. त्यानंतर सानप यांनी भाजपला सोडचिठ्ठी देत राष्ट्रवादीत प्रवेश केला होता. २०१९ची निवडणूक सानप यांनी लढवली होती, पण पराभवाचा सामना करावा लागला. विधानसभेत पराभव झाल्यामुळे सानप यांनी शिवसेनेत प्रवेश केला होता. आता शिवसेनेला रामराम ठोकून सानप पुन्हा भाजपमध्ये दाखल होणार आहे.
