जळगाव (प्रतिनिधी) शहरातील शनिपेठ पोलिस स्टेशनच्या हद्दीतील आर. सी. बाफना ज्वेलर्स येथे एका ग्राहकाने २२ कॅरेट सोन्याचे दागिने भासवत, ते दालनामध्ये विकून, त्याच्या बदल्यात २ लाख १३ हजार रुपयांचे दागिणे घेऊन सोने विक्री दालन मालकाची एकूण १ लाख ७७ हजार रुपयांमध्ये फसवणूक केली. ही घटना दि. ३० मार्च रोजी घडली आहे. या प्रकरणी शनिपेठ पोलिस ठाण्यात एका अज्ञाताविरुद्ध फसवणुकीचा गुन्हा दाखल करण्यात आला आहे.
गुढीपाडव्याच्या दिवशी शहरातील एका नामांकित सोने विक्रीच्या दालनात बुधवारी दुपारी १२.३० वाजेच्या सुमारास ३० ते ३५ वयोगटातील एक ग्राहक, सोन्याचे मोड काऊंटरवर आला. त्याठिकाणी प्रत्यक्षात ३६ हजार रुपये किंमतीची २५ ग्रॅम वजनाची १५.५ टक्के शुद्धता असलेली सोन्याची चैन व पेडंटवर ९१.६ चा हॉलमार्क मारुन ती २२ कॅरेट असल्याचे भासवून, ही चैन त्या सोन्याच्या दुकानात मोडली. त्या बदल्यात १ लाख ९४ हजार किंमतीचा सोन्याचा हार, १८ हजार रुपये किंमतीचे कानातले दागिणे व २ ग्रॅम सोन्याचा कॉईन असा २ लाख १३ हजार ३४८ रुपयांचा सोन्याचा माल खरेदी करून, सोन्याचे दालन असलेल्या मालकाची एकूण १ लाख ७७हजार रुपयांमध्ये फसवणूक केली. या प्रकरणी आर. सी. बाफना ज्वेलर्सचे कर्मचारी मनोज हुकूमचंद जैन यांच्या फिर्यादीवरुन शनिपेठ पोलिस ठाण्यात एका अज्ञात व्यक्तीविरुद्ध गुन्हा दाखल करण्यात आला आहे. पुढील तपास महिला उपनिरीक्षक प्रिया दातीर करीत आहेत.
