नवी दिल्ली (वृत्तसंस्था) हाथरस सामूहिक बलात्कार पीडित कुटुंबाला भेटण्यासाठी निघालेल्या काँग्रेसचे माजी अध्यक्ष राहुल गांधी आणि पक्षाच्या सरचिटणीस प्रियांका गांधी याना ग्रेटर नोएडाजवळ पोलिसांनी रोखले. त्यानंतर हाथरसला पायीच जाण्याचा निर्णय राहुल गांधी यांनी घेतला. मात्र यमुना एक्स्प्रेस वेवर त्यांना प्रशासनाने पुन्हा रोखण्याचा प्रयत्न केला. या वेळी राहुल गांधी आणि पोलिसांमध्ये धक्काबुक्की झाली. त्यानंतर राहुल गांधी यांनी तेथेच धरणे दिले. शेवटी पोलिसांनी राहुल गांधी यांना ताब्यात घेतले.
मला पीडित कुटुंबाला भेटायचे आहे- राहुल गांधी
पोलिसांनी मला धमकी देत खाली पाडल्याचे राहुल गांधी यांनी प्रसारमाध्यमांशी बोलताना म्हटले. मला एकट्याला हाथरसला जाऊ द्या असा मी पोलिसांकडे आग्रह धरला, मात्र पोलिसांनी आपला हा आग्रह मान्य केला नाही. एकट्या व्यक्तीवर कलम १४४ लागू होत नाही असे आपण म्हटले. मात्र पोलिस ऐकायला तयार नव्हते. आपल्याला पीडित कुटुंबाला भेटायचे आहे, असे राहुल म्हणाले.
पोलिसांनी मला धक्का मारून खाली पाडले- राहुल गांधी
मी हाथरसला जात असताना मला अडवताना पोलिसांनी मला धक्का देऊन खाली पाडले, त्यानंतर माझ्यावर लाठ्या चालवल्या आणि मला जमीनीवर पाडले, असे राहुल गांधी म्हणाले. या देशात काय फक्त पंतप्रधान नरेंद्र मोदी हेच फिरू शकतात का, असा सवालही राहुल गांधी यांनी उपस्थित केला. आमची गाडी अडवली गेली, त्यामुळे आम्ही पायीच हाथरसला जात होतो, असे ते म्हणाले.
राहुल गांधींच्या हाताला दुखापत- काँग्रेस नेत्याचा दावा
तर, राहुल गांधी यांच्या हाताला मार लागल्याचा दावा उत्तर प्रदेश काँग्रेसचे अध्यक्ष अजयसिंह लल्लू यांनी केला आहे. राहुल गांधी यांच्या हाताला पोलिसांनी धक्काबुक्की केली, त्यामुळे त्यांना मार लागला आहे. ते आता रस्त्यावर बसलेले आहेत. ते सध्या जखमी अवस्थेत आहेत, असे लल्लू यांनी सांगितले.
राहुल, प्रियांकांना पोलिसांच्या जीपमधून नेले, कार्यकर्त्यांवर लाठीचार्ज
पोलिसांनी राहुल गांधी आणि प्रियांका गांधी यांना अटक केल्यानंतर जीपमध्ये बसवून त्यांना पोलिस ठाण्यात नेण्यात आले. मात्र त्यावेळी काँग्रेसच्या कार्यकर्त्यांनी पोलिसांच्या जीपला घेराव घातला. त्यावेळी कार्यकर्त्यांना पांगवण्यासाठी पोलिसांनी कार्यकर्त्यांवर लाठीचार्ज केला.
राहुल गांधी यांना अडलल्यानंतर ते पायी जाऊ लागले- प्रियांका
राहुल गांधी हे बहीण आणि काँग्रेसच्या सरचिटणीस प्रियांका गांधी यांना ग्रेटर नोएडाजवळ रोखले गेले. त्यानंतर दोघेही आपल्या कार्यकर्त्यांसह पायीच हाथरसच्या दिशेने चालू लागले. मात्र पोलिसांनी त्यांना यमुना एक्स्प्रेस वेजवळ पुन्हा रोखण्याचा प्रयत्न केला. येथेच राहुल गांधी आणि पोलिसांमध्ये खेचाखेची झाली. त्यानंतर ते तेथेच धरणे देत बसले. त्यानंतर राहुल गांधी आणि प्रियांका गांधी यांना पोलिसांनी ताब्यात घेतले.
