नाशिक (वृत्तसंस्था) देशात कोरोनाचा प्रसार मोठ्या प्रमाणात होत आहे. अशात आता बाराशे रुपये किमतीचे रेमडेसिव्हिर इंजेक्शन तब्बल २५ हजार रुपयांना विकणाऱ्या डॉक्टरला रंगेहात अटक केली आहे. याप्रकरणी पंचवटी पोलीस ठाण्यात रात्री उशिरापर्यंत गुन्हा दाखल करण्याचे काम सुरू होते.
याबाबत अधिक माहिती अशी की, देवळाली कॅम्प व शहरातील रुग्णालयात दाखल रुग्णासाठी तीन रेमडेसिव्हिर इंजेक्शनसाठी फिरफिर करणारे सामाजिक कार्यकर्ते योगेश मोहिते यांना एक क्रमांक मिळाला. त्यांनी संबंधित क्रमांकावर कॉल केला असता तो कट करण्यात आला. काही वेळातच संबंधितांनी कॉल केला. यात बाराशे रुपये किमतीचे रेमडेसिव्हिर प्रतिइंजेक्शन २५ हजार रुपयांना देण्याचे ठरले. संबंधित इंजेक्शन देण्यासाठी अमृतधाम परिसरात रात्री आठ ते साडेआठच्या दरम्यान आले. मात्र मोहिते यांच्याकडे अवघे १६ हजार रुपये असल्याचे सांगितले. त्यांनी संबंधितांना अमृतधाम परिसरातील अॅक्सिस बँकेच्या एटीएमवर बोलविले. यावेळी सद्गुरू हॉस्पिटलचे डॉ. रविंद्र मुळूक त्या ठिकाणी आले. डॉ. मुळूक येण्याअगोदर मोहिते यांनी पोलिसांना घटना कळविली. त्यानंतरएटीएमवर डॉ. मुळूक आले असता मोहिते यांच्यासमवेत असलेल्या मित्राने ते आलेल्या वाहनाचे मोबाईलमध्ये छायाचित्र घेतले. ही बाब डॉ. मुळूक यांच्या लक्षात येताच त्यांनी पैसे तिथेच टाकून वाहनात बसून पळ काढला. दरम्यान, त्याच वेळी पोलिसांची गाडीही तेथे आली, त्यांनी वाहनाचा पाठलाग करीत डॉ. मुळूक यांना अडविले. आणि त्यांच्या गाडीची पाहणी केली. यावेळी पोलिसांना रेमडेसिव्हिर इंजेक्शन मिळून आले. डॉ. मुळूक व तक्रारदारांना पोलिसांनी पंचवटी पोलिस ठाण्यात आणले. याप्रकरणी रात्री बारापर्यंत गुन्हा दाखल करण्याची प्रक्रिया सुरू होती.
