जळगाव (प्रतिनिधी) आरोग्यास हानीकारक असलेला पानमसाला, तंबाखू, सुगंधित सुपारी यांची सर्रासपणे विक्री करणाऱ्यांवर राज्याने अन्न व औषध प्रशासन मंत्र्यांच्या आदेशाने नियुक्त केलेल्या पथकाने सोमवारी तीन ठिकाणी छापे टाकत कारवाई केली. पथकाने तब्बल ६ लाख २० हजारांचा मुद्देमाल जप्त करण्यात असून तीन जणांविरुद्ध गुन्हा दाखल करीत त्यांचे दुकाने सील करण्यात आले आहे. जिल्ह्यात मंत्र्याच्या विशेष पथकाने केलेल्या कारवामुळे अवैध गुटखा माफियांमध्ये प्रचंड खळबळ उडाली आहे.
मंत्री आत्राम यांच्या आदेशाने पथक तयार !
राज्यात प्रतिबंधित असलेल्या गुटख्यासह पानमसाला, तंबाखूची शहरासह जिल्ह्यात सर्रासपणे विक्री केली जात आहे. त्यामुळे त्यावर आळा घालण्यासाठी राज्याचे अन्न व औषध प्रशासन विभागाचे मंत्री धर्मरावबाबा आत्राम यांच्या आदेशाने पथक तयार करण्यात आले आहे. या पथकाला शहरातील तिजोरी गल्लीमध्ये प्रतिबंधित पानमसाला, तंबाखु, सुगंधित सुपारी विक्री होत असल्याची माहिती अन्न व औषध प्रशासन विभागाला मिळाली.
तिजोरी गल्लीतील मीरा,आशीर्वाद ट्रेडर्सची झाडाझडती !
मिळालेल्या माहिती नुसार पथक तिजोरी गल्लीतील मीरा ट्रेडर्स या दुकानावर पोहचले. त्याठिकाणी टाकलेल्या छाप्यात पथकाला दुकानातून पानमसाला, तंबाखू, सुपारी यांचे एकूण ७९२ पाकीट आढळून आले. त्यांची किंमत एक लाख चार हजार ५३५ असून याचे नमुने घेऊन साठा जप्त करण्यात आला. या सोबतच याच परिसरातील आशीर्वाद ट्रेडर्स या दुकानावरदेखील पथकाने कारवाई केली. या दुकानातूनही पानमसाला, तंबाखू, सुपारी यांचे एकूण ७५७ पाकीट व तंबाखूचे १९ डबे आढळून आले. त्याची किंमत ९८ हजार ८७५ रुपये आहे. या साठ्याचेही नमुने घेऊन तो जप्त करण्यात आला.
कारवाईनंतर तिन्ही दुकाने सील
या प्रकरणी अन्न सुरक्षा अधिकारी शरद पवार यांनी शहर पोलिस ठाण्यात फिर्याद दिली. त्यावरून मीरा ट्रेडर्सचे मालक संतोष हुकुमतमल राजपाल रा. सिंधी कॉलनी) व आशीर्वाद ट्रेडर्सचे मालक रवी चंद्रभान चिमनानी (रा. गणपतीनगर) व पंकज ट्रेर्डचे मालक भरत विनायक बाविस्कर, रा. पिंप्राळा रोड या तिघांविरुद्ध गुन्हा दाखल करण्यात आला आहे. पुढील तपास पोलिस निरीक्षक अनिल भवारी करीत आहेत.
