मीरा भाईंदर (वृत्तसंस्था) शहरातील एका महिलेवर पोलीस (Police) हवालदारानेच बलात्कार केल्याची घटना उघड झाली आहे. पोलीस हवालदार असल्याचा फायदा घेत नवऱ्यासोबत झालेला वाद मिटवून देतो असे आश्वासन आरोपीने पीडितेला दिले. त्यानंतर धारावी मंदिर (Dharavi Mandir) परिसरात नेऊन आरोपीने पीडितेवर बळजबरीने अत्याचार केला.
बाळासाहेब ढोले (वय २८) असे गुन्हा दाखल झालेल्या पोलीस हवालदाराचे नाव आहे. मिळालेल्या माहितीनुसार, २७ वर्षीय पीडित महिला भाईंदर पूर्व परिसरात राहते. काही दिवसांपूर्वी पीडितेचे आपल्या पतीसोबत भांडण झाले होते. घरगुती भांडणातून पीडिता पोलिसात तक्रार देण्यासाठी गेली होती. त्यावेळी पीडितेची ओळख पोलीस हवालदार बाळासाहेब ढोले याच्यासोबत झाली. बाळासाहेब याने नवऱ्यासोबत झालेला वाद मिटवून देतो असे आश्वासन पीडितेला दिले.
त्यानंतर बाळासाहेब याने पीडित महिलेला विश्वासात घेऊन भाईंदर रेल्वे स्थानकावर बोलवून घेतले. तेथून पश्चिमेला असलेल्या प्रसिद्ध धारावी मंदिर परिसरात नेऊन पीडितेची समजूत काढली. तसेच पीडित महिला नवऱ्यापासून खूश नसल्याचा फायदा घेत आरोपीने पीडितेवर जबदस्तीने अत्याचार केला. पोलिसानेच आपल्यावर अत्याचार केल्याने पीडित महिला प्रचंड घाबरली. त्यानंतर पीडितेने घडलेला सर्व प्रकार आपल्या घरातील सदस्यांना सांगितला.
दरम्यान, पीडितेच्या कुटुंबियांनी तात्काळ पोलीस ठाणे गाठत बाळासाहेब ढोले या पोलिसाविरोधात तक्रार दाखल केली. पीडित महिलेच्या तक्रारीवरून आरोपी बाळासाहेब याच्याविरोधात नवरघर पोलीस ठाण्यात बलात्काराचा गुन्हा दाखल करण्यात आला आहे. पीडित महिलेने तक्रार दाखल करत असताना संबंधित आरोपी पोलीस ठाण्यात उपस्थित होता होता. गुन्हा दाखल होताच त्याला तातडीने अटक करण्यात आली आहे.
