पिंपरी (वृत्तसंस्था) विस्कीमध्ये (Whiskey) गुंगीचे औषध टाकून एका महिला होमिओपॅथी डॉक्टरवर बलात्कार (Rape) केल्याचा प्रकार पिंपरी चिंचवडमध्ये उघडकीस आला आहे. तसेच आरोपीने महिला डॉक्टरला त्यांचे अश्लील व्हिडीओ व्हायरल (Viral) करण्याची धमकी (Threat) देऊन लाखो रुपये उकळले. याप्रकरणी पंकज अनिल खंडागळे याच्यावर वाकड पोलीस ठाण्यात गुन्हा (FIR) दाखल करुन अटक केली आहे.
याबाबत 26 वर्षाच्या पीडित महिलेने वाकड पोलिसांकडे फिर्याद दिली आहे. हा प्रकार 2016 ते 5 मे या कालावधीत बालेवाडी, चिंचवड येथील लॉजमध्ये वेळोवेळी घडला आहे. फिर्यादी यांनी गुरुवारी (दि.5) तक्रार केल्यानंतर पोलिसांनी पंकज अनिल खंडागळे (वय-28 रा. थेरगाव) याच्याविरुद्ध गुन्हा दाखल करुन अटक केली आहे. महिला पोलीस उपनिरीक्षक सी. एम. बोरकर यांनी दिलेल्या माहितीनुसार, पीडित महिला या होमिओपॅथी डॉक्टर असून आरोपी आणि त्यांची ओळख कॉलेजमध्ये असल्यापासून आहे. आरोपीने मैत्रीच्या संबंधातून फिर्यादी यांना बालेवाडी येथील एका लॉजवर घेऊन गेला. त्याठिकाणी व्हिस्कीमध्ये गुंगीचे औषध टाकून त्यांना बेशुद्ध केले. महिला बेशुद्ध झाल्यावर आरोपीने त्यांच्यावर बलात्कार केला. तसेच त्यांचे अश्लील व्हिडिओ आणि फोटो काढले. आरोपीने पीडित महिलेला व्हिडीओ आणि फोटो व्हायरल करण्याची धमकी देऊन बालेवाडी आणि चिंचवड येथील लॉजवर बोलावून घेत जबरदस्तीने शारीरिक संबंध प्रस्थापित केले. याशिवाय पंकज खंडागळे याने पीडित महिलेकडून वेळोवेळी 2 ते 3 लाख रुपये घेतले. मागील काही दिवसांपासून त्याचा भाऊ अखिलेश खंडागळे याच्या गुगल पे वर पैसे पाठवण्यास सांगून पीडित महिलेला शारिरीक आणि मानसिक त्रास दिला, असे फिर्यादीत म्हटले आहे. पुढील तपास पोलीस उपनिरीक्षक सी. एम. बोरकर करीत आहेत.
