बीड (वृत्तसंस्था) बारा ज्योतिर्लिंगापैकी एक अशी ओळख असलेल्या परळीतील वैजनाथ मंदिराच्या विश्वस्तांना ५० लाख रुपये द्या, अन्यथा मंदिर RDXने उडवू, असे धमकीचे पत्र एका गुंडाने पाठवले आहे. वैद्यनाथ देवस्थान ट्रस्टचे सचिव राजेश देशमुख यांना हे पत्र प्राप्त झाले आहे. या पत्रानंतर परळी शहर पोलिस ठाण्यात गुन्हा नोंद करण्यात आला असून पोलिसांनी मंदिर परिसराची सुरक्षा वाढवली आहे.
या पत्रात लिहिलं आहे की, आपण फार मोठ्या मंदिर संस्थानाचे विश्वस्त आहात. आत्तापर्यंत आपल्या मंदिराला भरमसाठ रक्कम देणगी रुपाने मिळाली आहे. मी फार मोठा नामी गुंड, ड्रग माफिया व गावठी पिस्तुलधारक आहे. मला ५० लाख रुपयांची तातडीने गरज आहे. हे पत्र मिळताच दिलेल्या पत्त्यावर रक्कम पोच करावी, अन्यथा मी वैद्यनाथ मंदिर माझ्याकडच्या RDX ने उडवेन. या पत्रामुळे सध्या एकच खळबळ माजली असून संस्थानाच्या तक्रारीवरुन शहर पोलीस ठाण्यात गुन्हा नोंदवण्यात आला आहे. या पत्राच्या पार्श्वभूमीवर मंदिर परिसरातली सुरक्षा व्यवस्थाही वाढवण्यात आली आहे.
परळी वैद्यनाथ हे देवस्थान बारा ज्योतिर्लिंगांपैकी एक मानले जाते. या मंदिरात दर्शनासाठी देशभरातून भाविक येत असतात. कोविड प्रादुर्भावामुळे दीर्घकाळापासून बंद असलेलं हे मंदिर आता निर्बंध शिथिल झाल्याने खुलं करण्यात आलं आहे. त्यामुळे येथे भाविकांची गर्दी असते. शुक्रवारी वैद्यनाथ मंदिर ट्रस्टचे सचिव राजेश देशमुख मंदिरात येऊन टपालाद्वारे आलेली पत्रे पाहत असताना त्यांना हे पत्र आढळले. हे पत्र व्यंकट गुरुपद मठपती या नावाने आले होते. रतनसिंग रामसिंग दख्खने, रा. काळेश्वर नगर, विष्णुपुरी, नांदेड या पत्त्यावरुन हे पत्र आले होते.
