अमळनेर (प्रतिनिधी) कोविडच्या काळात पहिल्या लाटेपासून अविरत सेवा देणाऱ्या रिक्तपदांवर सेवेत कायम करावे, अशी मागणी करत अमळनेर येथील कोविड हेल्थ सेंटर येथे कंत्राटी कामगारांनी हाताला लाल रिबीन बांधून “रेड अलर्ट” आंदोलन केले.
राज्यातील कंत्राटी कामगारांनी त्यांना आरोग्य विभागात मूळ सेवेत घेण्यात यावे यासाठी राज्यभर “रेड अलर्ट” आंदोलन सुरू केले आहे. २६ एप्रिल ते २९ एप्रिल रोजी या कर्मचाऱ्यांनी हाताला लाल रिबीन बांधून आपले कामकाज पाहिले. मागणी मान्य न झाल्यास यापुढे तीव्र स्वरूपाचे आंदोलन उभारण्यात येईल असा इशारा कोविड महामारी योद्धा संघर्ष समितीचे प्रमुख संतोष भांडे यांनी दिली आहे. यावेळी अमळनेर केंद्रावर योगेश चव्हाण, निखत सैय्यद, माधवी गायकवाड, प्रगती वानखेडे, राजश्री पाटील, रोशनी गवई, दीपक धनगर, चित्रा बडगुजर, वैशाली चव्हाण, सचिन पाटील आदी कंत्राटी कर्मचारी उपस्थित होते.
