पाचोरा (प्रतिनिधी) धावत्या रेल्वेत चढणे म्हणजे मृत्यूला आमंत्रण देणे. हे माहित असतानाही अनेकजण धावती रेल्वे पकडण्याचा प्रयत्न करतात व विनाकारण मृत्यूला सामोरे जातात. असाच प्रकार पाचोरा येथे घडला आहे. पाण्याची बाटली भरण्यासाठी रेल्वे प्लॅटफॉर्मवर उतरलेल्या लासलगाव येथील तरुणाचा धावती रेल्वेत चढण्याचा प्रयत्न करताना पाय घसरून गाडी खाली आल्याने त्याचा मृत्यू झाला आहे.
लासलगाव (जि. नाशिक) येथील संकेत सोनवणे हा युवक भरतीसाठी गेलेला होता. झेलम एक्सप्रेसने गावी परतत असताना पाचोरा रेल्वे स्थानकावर फलाट क्रमांक दोनवर गाडी थांबली. यामुळे तो पिण्याच्या पाण्याची बाटली भरण्यासाठी खाली उतरला. बाटली भरण्यास वेळ झाल्याने एक्सप्रेस मार्गस्थ झाली. यामुळे घाई गळबळीत धावती रेल्वे पकडण्याच्या प्रयत्नात त्याचा पाय सरकला आणि तो डब्याखाली आला. त्याचा उजवा पाय कापला गेला. रेल्वे पोलीस दिनेश पाटील यांनी त्यास तातडीने ग्रामीण रुग्णालयात दाखल केले. तेथे प्राथमिक उपचार केल्यानंतर त्यास जळगाव येथील सामान्य रुग्णालयात भरती करण्यात आले. परंतु उपचारादरम्यान त्याचा मृत्यू झाला. त्याच्याजवळ असलेल्या कागदपत्रांवरून त्याची ओळख पटल्याने त्याच्या नातलगांना खबर देण्यात आली. शवविच्छेदन करून मृतदेह नातलगांच्या ताब्यात देण्यात आला आहे. तसेच या प्रकरणी रेल्वे पोलिसांनी अकस्मात मृत्यूची नोंद केली आहे.
