धरणगाव (प्रतिनिधी) तालुक्यातील पिंप्रीजवळ धुमाकूळ घालणाऱ्या रस्ता लुटारूंच्या टोळीला अवघ्या काही तासांत जेरबंद करण्यात धरणगाव पोलिसांनी यश मिळाले आहे. गुप्त माहितीच्या आधारे चौघांना सापळा रचून पोलिसांनी शिताफीने अटक केली. सुनील अशोक कुऱ्हाडे (वय १९ रा.पिंप्री खुर्द ता. धरणगाव), गोपाल संजय कुऱ्हाडे (वय २२,रा.पिंप्री खुर्द ता. धरणगाव), गणेश संजय कुऱ्हाडे (वय २०,रा.पिंप्री खुर्द ता. धरणगाव), कृष्णा अनिल (वय १९,रा.पिंप्री खुर्द ता. धरणगाव), असे अटक केलेल्या संशयित आरोपींची नावे आहेत.
नेमकी काय होती घटना
रस्त्यात अडवून वेगवेगळ्या घटनेत दोघांना मारहाण करून लुटल्याची खळबळजनक घटना पिंप्रीजवळ घडल्या होत्या. पहिली घटना रात्री साडेदहा वाजेच्या सुमारास विनोद शिवाजी पवार (रा. पढावद ता. शिंदखेडा) यांच्यासोबत घडली. अज्ञात तीन ते चार लोकांनी त्यांना वाघळूद बु. गांवाकडे जाणाऱ्या रोडवर, पिंप्रीखुर्द गांवाचे बाहेरील साईनगरी जवळ अडवले. यानंतर विनोद पाटील यांना जमिनीवर खाली पाडून त्यांच्या खिशातील मोबाईल,ब्लू ट्युथ आणि १५०० रुपये रोख, असा एकूण १६ हजार ५० रुपये किंमतीचा ऐवज जबरीने लुटून नेला होता. तर दुसऱ्या घटना अवघ्या अर्ध्या तासानंतर म्हणजे ११ वाजेच्या सुमारास घडली होती. संदीप सुरेश बोरसे (रा.सात्री ता. अमळनेर) यांना धरणगावकडे जाणाऱ्या नदीवरील पुलाजवळ तीन-चार अज्ञात इसमांनी येवून धक्काबुक्की करून माझ्या खिश्यातील ९ हजार ८०० रूपये किंमतीचा मोबाईल जबरीने लुटून पोबारा केला. या प्रकरणी देखील गुन्हा दाखल झाला असून दोन्ही गुन्ह्यांचा तपास पो.ना मोती पवार हे करीत होते.
संशयितांना असे केले जेरबंद
एकाच रात्री रस्ता लुटीच्या दोन घटना घडल्यामुळे पोलिस निरीक्षक राहुल खताळ यांनी आपल्या पथकासह तपासचक्र फिरवायला सुरुवात केली. त्यानुसार त्यांना माहिती मिळाली की, पिंप्री गावात काही जणांनी जुना मोबाईल विकला आहे. त्यानुसार पो.नि. खताळ यांनी तपासधिकारी पोहेकॉ मोती पवार, पोहेकॉ राजेंद्र कोळी, उमेश पाटील यांच्या पथकाला पिंप्री गावाकडे रवाना केले. या पथकाने गुप्त माहिती काढत चौघांना सापळा रचून अटक केली. अवघ्या काही तासात रस्ता लुटारूंच्या टोळीला अटक केल्यामुळे धरणगाव पोलिसांचे कौतुक होत आहे.
मौजमस्तीसाठी करायचे जबरी चोरी
पोलिसांनी सुनील कुऱ्हाडे, गोपाल कुऱ्हाडे, गणेश कुऱ्हाडे, कृष्णा राठोड यांना अटक केल्यानंतर त्यांच्याकडून गुन्ह्यातील एक मोबाईल आणि ब्ल्यू ट्युथ जप्त केला आहे. चौकशीत फक्त मौजमस्तीसाठी आपण जबरी चोरी करत असल्याची माहिती त्यांनी पोलिसांना दिली आहे. सर्वांना न्यायालयात हजर केले असता न्यायालयाने त्यांना एका दिवसाची पोलीस कोठडी सुनावली आहे. उद्या पुन्हा त्यांना न्यायालयात हजर केले जाणार आहे. दरम्यान, अवघ्या विशीतील तरुण त्यातही दोन सख्खे भाऊ फक्त मौजमस्तीसाठी गुन्हेगारीकडे वळल्याचे समोर आल्यामुळे पोलीसही हैराण झालेत. या टोळीकडून अजून काही गुन्हे उघडकीस होण्याची शक्यता वर्तवली जात आहे.
