पुणे (वृत्तसंस्था) जुन्नर तालुक्यातील अनंत ग्रामीण बिगर शेती सहकारी पतसंस्थेत आज दुपारी दीड वाजण्याच्या सुमारास दोन अज्ञात इसमांनी गोळीबार केला. यामध्ये व्यवस्थापकाचा मृत्यू झाला आहे. या दरोड्यात दरोडेखोरांनी अडीच लाख रुपयांची रोकड लंपास केल्याची माहिती समोर आली आहे.
याबाबत सविस्तर माहिती अशी की, १४ नंबर येथील अनंत पतसंस्था ही पुणे नाशिक महामार्ग लगत आहे. दुपारी दीड वाजण्याच्या सुमारास व्यवस्थापक राजेंद्र दशरथ भोर (वय ५२) व अंकिता नेहरकर हे जेवण करत असताना दोन अज्ञात व्यक्तीने पतसंस्थेत प्रवेश करून व्यवस्थापक राजेंद्र पवार यांच्याकडे पैशाची मागणी केली. यास भोर यांनी विरोध दर्शविला असता दरोडेखोरांनी गोळीबार केला. यामध्ये राजेंद्र भोर यांना गोळी लागल्याने ते जखमी झाले. त्यांना उपचारासाठी नारायणगाव या ठिकाणी नेण्यात आले. पण त्यांचा मृत्यू झाल्याचे डॉक्टरांनी घोषित केले. पोलीस घटनास्थळी दाखल झाले असून पुढील तपास करत आहेत.
