नांदेड (वृत्तसंस्था) मागील २ वर्षांत पित्यानेच स्वतःच्या अल्पवयीन मुलीला वेगवेगळ्या तीन जणांना विकल्याचा धक्कादायक प्रकार समोर आला आहे. पीडित मुलगी नांदेड मधील हदगाव येथील रहिवासी आहे. औरंगाबादमध्ये गुन्हा घडल्याने हदगाव पोलिसांनी गुन्हा दाखल करून तपास औरंगाबाद पोलिसांकडे वर्ग केला आहे. या प्रकरणातील मुख्य आरोपीला पोलिसांनी ताब्यात घेतले आहे.
मिळालेल्या प्राथमिक माहितीनुसार, पीडित मुलगी ही नांदेडची आहे. या मुलीला वडिलांनी राजस्थानमधील कोटा येथील एका व्यक्तीला विकले. येथे आरोपींनी तिच्यावर अत्याचार सुद्धा केल्याची माहिती समोर येत आहे. मग आरोपीने या मुलीला पुन्हा आपल्या वडिलांकडे आणून सोडले. त्यानंतर पीडित मुलीला नंदूरबार येथे विकले. या ठिकाणी ज्या व्यक्तीला विक्री करण्यात आली होती त्याने पैसे न दिल्याने तिला पुन्हा घरी आणले. यानंतर आरोपी बापाने पुन्हा तिसऱ्यांदा मुलीची विक्री केली. तिसऱ्यांदा या मुलीची विक्री साताऱ्यात करण्यात आली. पीडित मुलीने फोनवरुन आपल्या मावशीला घडलेला प्रकार सांगितला त्यानंतर हा प्रकार उघडकीस आला. या प्रकरणी पोलीस अधिक तपास करत आहे.
