नवी दिल्ली (वृत्तसंस्था) नाटोमध्ये सामील होण्याच्या मुद्द्यावरून रशिया (Russia) आणि युक्रेन (Ukraine) मध्ये प्रचंड युद्ध सुरू आहे. अमेरिका आणि नाटो देशांच्या धमक्यांकडे दुर्लक्ष करून रशियन सैन्याने युक्रेनच्या सर्व भागांवर जोरदार हल्ला चढवला आहे. दरम्यान, रशिया आणि युक्रेनमधील युद्धादरम्यान पुन्हा एकदा बाबा वांगा भविष्यवाणीची चर्चा जोर धरू लागली आहे.
व्लादिमिर पुतिन यांच्या कार्यकाळात रशियाचा उत्कर्ष होईल. रशिया युरोपवर राज्य करेल. पण युरोपच्या मोठ्या भागाचे रुपांतर वाळवंटात होईल, अशा स्वरुपाचे भविष्य बाबा वांगा नावाच्या फकिराने वर्तविले होते असा संदेश सोशल मीडियावर व्हायरल होत आहे. बाबा वांगा यांच्या भाकितानुसार मोठे स्फोट होतील, बर्फ वितळेल, पर्यावरणाचे संतुलन बिघडेल. युद्ध, भूकंप, वादळ, पूर अशा संकटांमुळे युरोपच्या मोठ्या भागाचे रुपांतर वाळवंटात होईल. उर्वरित युरोपवर पुतिन यांचे राज्य असेल.
बल्गेरियाच्या बाबा वांगा यांना ‘बाल्कनचे नॉस्ट्राडेमस’ म्हणतात. बाबा वांगा यांचे नाव वांगेलिया पांडेवा गुश्टेरोवा असे होते. त्यांचा जन्म १९११ मध्ये झाला. बाराव्या वर्षी त्यांनी दृष्टी गमावली आणि नंतरच्या काळात भविष्य बघण्याची दिव्यदृष्टी मिळविली. बाबा वांगा यांचा मृत्यू ८५ व्या वर्षी १९९६ मध्ये झाला. त्यांनी ५०७९ पर्यंतच्या जगातील अनेक महत्त्वाच्या घडामोडींचे भविष्य सूचक शब्दांमध्ये वर्तविले आहे. त्यांनी वर्तविलेल्या भाकितांपैकी ८५ टक्के भाकिते खरी ठरली आहेत.
प्रिन्सेस डायनाचा मृत्यू (१९९७), अमेरिकेत झालेला ११ सप्टेंबर २००१चा दहशतवादी हल्ला, जपान त्सुनामी (२००४), २०१०चे ‘अरब स्प्रिंग’, ब्रेक्झिटद्वारे यूकेचे युरोपियन युनियनमधून बाहेर पडणे ही त्यांची निवडक खरी ठरलेली ऐतिहासिक भाकीते आहेत. आयसिसिचा उदय, आफ्रिकन-अमेरिकन असलेले बराक ओबामा अमेरिकेचे अध्यक्ष होणे ही भाकिते पण बाबा वांगा यांनी वर्तविली होती.
