शिर्डी (वृत्तसंस्था) साई मंदिरात दर्शन करायला येताना भारतीय पोशाखात यावं अथवा सबाह्य कपडे घालावे असं आवाहन करणारे फलक मंदिर परिसरात दोन दिवसापूर्वी लावले आहेत. हा निर्णय खूप पूर्वीचा असला तरी केवळ फलक लावल्यानं आता नव्या वादाला सुरुवात झाली आहे. सामाजिक कार्यकर्त्या तृप्ती देसाई यांनी ने त्वरित बोर्ड हटविण्याची मागणी केली आहे. बोर्ड हटवला तर आंदोलन करण्याचा इशारा देखील दिला आहे.
साईबाबा संस्थानच्या ड्रेसकोडबाबत भक्तांना आवाहन करणारे फलक लावल्यानंतर आता या फलकावरून वाद निर्माण झाला आहे. यामुळे आता शिर्डी ग्रामस्थ विरुद्ध तृप्ती देसाई या नव्या वादाच्या अंकाला सुरुवात होण्याची शक्यता आहे. दुसरीकडे साई संस्थानने यावर कोणतीही प्रतिक्रिया दिली नसून आम्ही आवाहन केलं असून सक्ती नाही यावर ते ठाम आहेत. सामाजिक कार्यकर्त्या तृप्ती देसाई यांनी १० डिसेंबरला शिर्डीत येऊन फलक काढण्याचा इशारा दिल्यानंतर आता शिर्डीत ग्रामस्थांसह विविध सामाजिक संघटना आक्रमक झाल्या असून भविष्यात तृप्ती देसाई यांनी असं काही केल्यास जशास तसे उत्तर देण्याचा निर्णय घेतलाय. एकीकडे संस्थानच्या या निर्णयाचा ज्या साई भक्तांवर याचा परिणाम होणार आहे, त्यांनी मात्र आपल्या प्रतिक्रिया देताना काहींनी स्वागत केलं आहे. तर काहींनी हा निर्णय चुकीचा वाटतो. मात्र अशा आवाहनामुळे राजकारण करु नये अशीही भावना भक्तांनी बोलून दाखवली आहे.
