मुंबई (वृत्तसंस्था) बॉलिवूड अभिनेता सैफ अली खानचा लवकरच ‘आदिपुरुष’ हा चित्रपट प्रेक्षकांच्या भेटीला येणार आहे. मात्र हा चित्रपट प्रदर्शनापुर्वीच वादाच्या भोवऱ्यात अडकला आहे. या चित्रपटात रावणाची मानवीय बाजू दाखवण्यात येईल अशी घोषणा सैफ अली खानने केली होती. या वादग्रस्त वक्तव्यामुळे सैफवर टीका केली जात होती. आता सैफने त्याचे विधान मागे घेतले आहे. मी सर्वांची माफी मागतो आणि माझे विधान मागे घेतो’ असे सैफ म्हणाला आहे.
बॉलिवूड अभिनेता सैफ अली खान याने सीताहरणबाबत केलेल्या वक्तव्यावरुन वाद उफाळल्यानंतर त्याने आपलं विधान मागे घेतले आहे. “कुणाच्याही भावना दुखावण्याचा माझा हेतू नव्हता. मी सर्वांची मनापासून माफी मागतो आणि माझं विधान मागे घेतो”, असं सैफ अली खान म्हणाला आहे. ‘व्हारल भयानी’ने आपल्या इन्स्टाग्राम पोस्टवर सैफचं स्पष्टीकरण शेअर केलं आहे. पुढे म्हणाला की, ‘प्रभू रामचंद्र हे माझ्यासाठी नेहमीच शौर्याचे प्रतीक आहेत. सर्व वाईट गोष्टींवर मिळवलेल्या विजयाचा उत्सव साजरा करणे म्हणजे आदिपुरुष. कोणतीही विकृती न दाखवता हा चित्रपट सादर करण्यासाठी संपूर्ण टीम एकत्र काम करत आहे.’ सैफ अली खान ‘आदिपुरुष’ या चित्रपटात रावणाची भूमिका साकारणार आहे. मुंबई मिररला दिलेल्या मुलाखतीत सैफने या भूमिकेवर भाष्य केले होते. “रावणाला आजवर आपण केवळ खलनायच्या भूमिकेत पाहिले आहे. पण तो खलनायक नव्हता. तो देखील एक माणूस होता. रावण माणूस म्हणून कसा होता? याचं चित्रण आदिपुरुषमध्ये प्रेक्षकांना पाहायला मिळेल. रावणाने भगवान श्री राम यांच्यासोबत युद्ध केले हे सर्वांनाच माहित आहे. पण त्याला देखील एक पार्श्वभूमी होती. रामाचे भाऊ लक्ष्मण यांनी सुर्पनखाचं नाक कापले होते. त्यानंतर हे युद्ध होणारच होते. या चित्रपटात रावणाची विचारसरणी काय होती हे दाखवले जाणार आहे” असे सैफ म्हणाला होता.
