जळगाव (प्रतिनिधी) महापालिका अंतर्गत आशासेविकांची नियुक्ती करण्यात आली आहे. परंतु, त्यांना अधिकृतरित्या प्रशिक्षण देण्यात न आल्याने त्यांचे वेतन रखडले आहे. त्यामुळे त्यांना प्रशिक्षण देऊन त्यांचे थकीत वेतन देण्यात यावे, अशी मागणी नगरसेवक व मनपा रुग्णालय नियंत्रण समितीचे सदस्य महेश चौधरी यांनी केली आहे.
याबाबत त्यांनी महापालिकेच्या आयुक्तांना दोन वेळा पत्रही दिले आहे. पहिल्या पत्रात महेश चौधरी यांनी म्हटले आहे की, महापालिका अंतर्गत शहरात आशासेविकांच्या नियुक्त्या झाल्या आहेत. मात्र, त्यांना अद्याप अधिकृत प्रशिक्षण देण्यात आले नाही. त्यामुळे त्यांना शहरात सर्व्हक्षण करताना बर्याच अडचणी येतात, असे पत्र या अगोदर वर्षाभरापूर्वी आयुक्तांना दिले आहे. त्यानंतर याप्रकरणी आता पुन्हा आयुक्तांना पत्र देण्यात आले आहे. कोरोनासारख्या महामारीत आशासेविका स्वत:चा जीव धोक्यात घालून आरोग्य विषयक विविध कामकाज करीत आहेत. त्या कोरोनाविषयी जनजागृती करीत आहेत. बाळांसाठी लसीकरण मोहीम राबवित आहेत. त्यांना अधिकृतरित्या कोणतेही प्रशिक्षण नसताना देखील त्यांनी आपली जवाबदारी उत्कृष्ठरित्या बजावली आहे. परंतु, अधिकृतरित्या प्रशिक्षण झाल्याशिवाय त्यांना मोबदला मिळत नाही. त्यामुळे प्रशिक्षण प्रक्रिया पूर्ण करुन त्यांना त्वरित थकीत वेतनही देण्यात यावे, अशी मागणी
महेश चौधरी यांनी केली आहे.
