मुंबई (वृत्तसंस्था) गेल्या तीन दिवसांपासून राष्ट्रवादीचे नेते धनंजय मुंडे यांच्यावर झालेल्या बलात्काराच्या आरोपांवरून राज्यातील राजकीय वातावरण ढवळून निघाले आहे. असे असताना आजचा दिवस महाराष्ट्रासाठी खूप मोठा ठरण्याची शक्यता आहे. संजय राऊत सकाळी सकाळीच राष्ट्रवादीचे अध्यक्ष शरद पवारांच्या सिल्व्हर ओक या निवासस्थानी दाखल झाले आहे.
प्रमुख नेत्यांवर झालेल्या आरोपांमुळे महाविकासआघाडीचे सरकार अडचणीत सापडले असताना आता शिवसेना खासदार संजय राऊत हे शरद पवार यांच्या भेटीसाठी त्यांच्या सिल्व्हर ओक या निवासस्थानी दाखल झाले आहे. मात्र, यावेळी संजय राऊत यांच्याबरोबर त्यांची पत्नी आणि मुलगीही उपस्थित होती. त्यामुळे सिल्व्हर ओकवरील संजय राऊतांच्या सहकुटुंब भेटीचे नेमके कारण काय आहे, याची चर्चा रंगली आहे. काही दिवसांपूर्वीच संजय राऊत यांची पत्नी वर्षा राऊत यांना आर्थिक गैरव्यवहारप्रकरणात ईडीकडून नोटीस पाठवण्यात आली होती. त्यानंतर वर्षा राऊत यांची दोनदा चौकशीही झाली. हे वादळ शांत होत नाही तोच आता राष्ट्रवादी काँग्रेसचे प्रमुख नेते धनंजय मुंडे यांच्यावर बलात्काराचा गंभीर आरोप करण्यात आला आहे. त्यामुळे महाविकासआघाडी सरकार कधी नव्हे इतके संकटात सापडले आहे. परिणामी आता महाविकासआघाडीतील प्रत्येक नेत्याच्या भेटीगाठीतून कोणते ना कोणते अर्थ काढले जात आहेत. मात्र, संजय राऊत यांचीही सहकुटुंब भेट सर्वांसाठीच अनपेक्षित ठरली आहे. आता ही केवळ सदिच्छा भेट आहे की यावेळी संजय राऊत आणि शरद पवारांमध्ये कोणती राजकीय चर्चा होणार, याकडे सर्वांच्या नजरा लागल्या आहेत.
पीएमसी बँकेतील कथित घोटाळ्याप्रकरणी ईडीकडून आतापर्यंत वर्षा राऊत यांची दोनदा चौकशी करण्यात आली आहे. संजय राऊत यांचे निकटवर्तीय प्रवीण राऊत यांच्या पत्नी माधवी राऊत आणि वर्षा राऊत यांच्यात झालेले आर्थिक व्यवहार ईडीच्या रडारवर आहेत. याशिवाय, शिवसेनेचे माजी खासदार आनंदरावर अडसुळ यांचीही ईडीकडून चौकशी होण्याची शक्यता व्यक्त केली जात आहे.
थोड्याच वेळात राष्ट्रवादीचे आणखी एक भाजपातून डेरेदाखल झालेले नेते एकनाथ खडसे ईडीच्या कार्यालयात जाण्याची शक्यता आहे. भोसरी भूखंड घोटाळा प्रकरणी त्यांची चौकशी गेल्या महिनाभरापासून प्रलंबित आहे. कोरोना क्वारंटाईनमुळे खडसेंनी १४ दिवसांचा अवधी वाढवून मागितला होता. तो आज संपला असून ईडीने त्यांना चौकशीसाठी बोलावले आहे.
