नवी दिल्ली (वृत्तसंस्था) प्रेमप्रकरणातून एका बारावीतील विद्यार्थ्याची हत्या करण्यात आल्याची खळबळजनक घटना दिल्लीत घडली आहे. धक्कादायक म्हणजे या प्रकरणी पोलिसांनी एका अल्पवयीन मुलाला अटक केली आहे. तर दोघा संशयित आरोपींचा पोलिसांकडून शोध सुरु आहे.
ज्वाला नगर स्मशानभूमीजवळ एका बारावीतल्या मुलाला चाकूने भोसकण्यात आलं. प्रेमप्रकरणातून हे हत्याकांड झालं असल्याचं सांगण्यात आलं. बारावीतील मुलाला चाकूने भोसकण्यात आल्यानंतर जखमी अवस्थेतील या मुलाला रुग्णालयातही घेऊन जाण्यात आलं. रक्तबंबाळ अवस्थेत रुग्णालयात या मुलाला आणण्यात आल खरं. पण त्याआधीच या मुलाचा जीव गेला होता. अखेर डॉक्टरांनी या मुलाला मृत घोषित केलं.
पोलिसांचं पथक रुग्णालयात दाखल झाल्यानंतर या मुलाचा मृतदेह रक्ताने माखलेल्या अवस्थेत रस्त्याच्या कडेला पडून होता, असंही तपासातून समोर आलं. 11 ऑगस्ट रोजी संध्याकाळी युवराज नावाचा बारावीतील मुलगा प्रिन्स नावाच्या आपल्या मित्रासोबत होता. हे दोघेही जण ज्वाला नगर येथील स्मशानभूमीजवळ बसले होते. तेव्हा तिघेजण आले. त्यांची नावं सनी, लकी अशी असून तिसरा मित्र अल्पवयीन होता. चर्चेदरम्यान, एका मुलीचा विषय निघाला. या मुलीवर वाद सुरु झाला. या वादातून शब्दाला शब्द वाढत गेला आणि अखेर तिघांनी टोकाचं पाऊल उचलत युवराजवर चाकूने सपासप वार केले. चाकूने भोसकल्यामुळे युवराज रक्तबंबाळ झाला होता. युवराजवर हल्ला केल्यानंतर सगळे तिघे मारेकरी पळून गेले.
