गडचिरोली (वृत्तसंस्था) भामरागड तालुक्यातील अतिदुर्गम गुंडापुरीत वृद्ध आजी- आजोबांसह नातीची गळा चिरून हत्या केल्याची घटना गुरुवारी (७ डिसेंबर) उघडकीस आल्यानंतर प्रचंड खळबळ उडाली आहे. अर्चना रमेश तलांडी (१०, रा. येरकल, ता. एटापल्ली), देवू दसरू कुमोटी (६०), बिच्चे देवू कुमोटी (५५, रा. गुंडापुरी, ता. भामरागड) अशी मृतांची नावे आहेत.
कुमोटी यांची विवाहित मुलगी मरकल (ता. एटापल्ली) येथे राहते. चौथीच्या वर्गात शिकणारी तिची कन्या अर्चना तलांडे ही दिवाळी सुटीत आजी-आजोबांकडे आली होती. अर्चना तलांडीसह देवू व बिच्चे कुमोटी या तिघांचा गळा चिरलेल्या अवस्थेतील मृतदेह ७ डिसेंबरला घरात आढळून आलेत. त्यामुळे एकच खळबळ उडाली.
घटनास्थळी एटापल्लीच्या बुर्गी (कांदोळी) ठाण्याच्या पोलिसांनी धाव घेत पंचनामा करून मृतदेह उत्तरीय तपासणीसाठी पाठवले होते. गुंडापुरी गावात देऊ कुमोती, बिच्छे कुमोती व अर्चना तलांडी आपल्या शेतात भात काढणीच्या कामासाठी राहत होते. प्राथमिकदृष्ट्या ही हत्या टणक व बोथट चस्तूने झाली असल्याचे समोर आले आहे. ‘ही घटना संपत्तीच्या वादातून झाल्याची प्राथमिक माहिती आहे. नागरिकांनी अफवांवर विश्वास ठेवू नये. योग्य तो तपास करून आरोपींना जेरबंद केले जाईल,’ अशी माहिती गडचिरोलीचे पोलिस अधीक्षक नीलोत्पल यांनी दिली.
