जळगाव (प्रतिनिधी) दुकान बंद करून घरी जात असताना व्यापाऱ्याची 8 लाख रुपये रोकड असलेली बॅग दुचाकीवर आलेल्या दोन चोरट्यांनी जबरदस्ती हिसकावून पळ काढल्याची खळबळजनक घटना सोमवारी रात्री जळगावात घडली. (Jalgaon Crime News)
सिंधी कॉलनीत राहणारे मेधानी हे दाणा बाजारात नमकिनचा व्यापार करतात. मेधानी हे नेहमी प्रमाणे घरी सोमवारी रात्री साडे नऊच्या सुमारास घरी जात होते. यावेळी त्यांनी दुकानात आलेली ८ लाख रुपयांची रोकड सोबत घेतली होती. पांडे चौक ओलांडल्यानंतर रामदेव बाबा मंदिरा समोरून जात असताना मागून आलेल्या एका दुचाकीवरील दोन तरुणांनी त्याच्या गाडीसमोर आपली दुचाकी आडवी उभी केली व रस्ता अडवला. याच वेळी मागे बसलेल्या चोरट्याने मेधानी यांच्या जवळील कॅश, लॅपटॉप, मोबाईल असलेली बॅग जबरदस्तीने हिसकवत पळ काढला. बॅग हिसकावून भामट्यांनी शेजारील गल्लीतून नेरी नाक्याकडे धूम ठोकली. घटनेची मिती मिळताच एमआयडीसी व जिल्हा पेठ पोलिस घटनास्थळी पोहचले होते. अप्पर पोलीस अधीक्षक चंद्रकांत गवळी, डीवायएसपी संदीप गावित हे देखील पोहचत तपासाबाबत सूचना केल्यात.
