नाशिक (वृत्तसंस्था) पंचवटीत पेठ रोड परिसरातील एरंडवाडीत मंदिराजवळ एका पोत्यात पाच ते सात मानवी कवट्या आढळल्या. कवट्या प्लास्टिकच्या बनविण्यात आल्या असून, संशयित अघोरी विद्याच्या पूजेसाठी वापरत असल्याची माहिती आली आहे. नीलेश थोरात (वय ३८, रा. पंचवटी) असे संशयिताचे नाव आहे.
रविवारी सकाळी एरंडवाडीतील एका मंदिराजवळ पोत्यात पाच ते सात मानवी कवट्या आढळल्या. पंचवटी पोलिसांनी घटनास्थळी जाऊन पोते ताब्यात घेतले. कवट्यांची पाहणी केली असता त्या प्लास्टिकपासून बनविल्याचे आढळून आले. संशयित आरोपी निलेश हा जवळील मंदिरात संशयित काळी जादू किंवा अघोरी विद्येसाठी या कवट्यांचा वापर करीत असल्याचा संशय आहे. या प्रकरणी पोलिसांनी संशयिताला ताब्यात घेतले आहे.
गळ्यात कवट्यांची माळ टाकून अलौकिक शक्ती प्राप्त झाल्याचा दावा करून अघोरी प्रथांचा वापर करून इतरांनाही तसे करण्यास प्रवृत्त करत असल्याचे निलेश थोरातने सांगायचा. अगदी चमत्कार दाखवत पैसे उकळत असल्याची कबुली त्याने दिली. त्याच्यावर पंचवटी पोलीस ठाण्यात गुन्हा दाखल करण्यात आला आहे.
हा अघोरी प्रकार असून, जादूटोणा करण्याच्या उद्देशाने हा खोडसाळपणा करण्यात आला का, या दृष्टीनेदेखील पोलीस तपास करीत आहे. यासाठी मंदिरातील पुजारी व इतर नागरिकांची चौकशी केली जाणार आहे, तसेच परिसरातील सीसीटीव्ही देखील तपासले जाणार आहे. मंदिर परिसरामध्ये हाडे आणून नेमका कोणता प्रकार करण्यात आला, हे तपासानंतर समजणार आहे.
