वाशिम (वृत्तसंस्था) रिसोड तालुक्यातील वाडी वाकद येथील रहिवासी तथा पिंपरखेड गावाजवळच्या भगवानबाबा संस्थानमध्ये पूजा-अर्चा करणाऱ्या वृद्ध वडिलांचा पोटच्या मुलानेच धारदार शस्त्राने खून केल्याची खळबळजनक घटना १६ मे रोजी सकाळी उघडकीस आली. संजय आत्माराम मुंढे असे आरोपी मुलाचे नाव तर आत्माराम धोंडू मुंढे असे मृतकाचे नाव आहे.
मृतकाचा भाऊ रामकिसन मुंढे यांनी रिसोड पोलिसांत दाखल केलेल्या फिर्यादीत नमूद केले आहे की, त्यांचे भाऊ आत्माराम हे गेल्या १० वर्षांपासून रिसोड तालुक्यातील पिंपरखेड चौफुलीनजिकच्या भगवानबाबा संस्थानमध्ये पुजाअर्चा करण्याचे काम करित होते. त्यांचा मुलगा संजय हा वडिलांकडे नेहमीच पैशांची मागणी करायचा. पैसे न दिल्यास एखादवेळी जिवाने मारून टाकणार, अशी धमकीही तो द्यायचा. १५ मे रोजी आत्माराम मुंढे यांना बँकेतून काही पैसे मिळाले असता, संजय मुंढे याने त्यांच्याकडे पैशाची मागणी करत वाद घातला. यावेळी मृतक आत्माराम यांच्या बहिणीने संजयची समजूत घालून त्याला तेथून काढून दिले. मात्र, पैसे न दिल्याचा राग मनात ठेवून संजयने १५ मे रोजी रात्रीच्या सुमारास धारदार शस्त्राने वडिलांचा झोपेतच खुन केला, अशी धक्कादायक माहिती रामकिसन मुंढे यांनी दिलेल्या फिर्यादीतून समोर आली आहे.
तर दुसरीलाडे शेतीमधील हिस्सा आणि पैसे देण्यावरून भांडण झालं, त्यातून बाप आणि मुलामधला वाद कुटुंबातील सदस्यांनी सोडवला. परंतू मात्र संजय मुंढेच्या डोक्यातून राग गेलेला नव्हता. त्यामुळे त्याने भगवानबाबा मंदिर परिसरामध्ये झोपलेल्या वडिलांवर तीक्ष्ण वस्तूने वार करून हत्या केल्याची देखील धक्कादायक माहिती समोर येत आहे. वडिलांची हत्या केल्यानंतर संजय गावातून पळून गेला होता. मात्र, डॉग स्कॉडच्या साहाय्याने तपास केला, तेव्हा कुत्र्याने संजय मुंढेला ओळखलं. त्यामुळे त्याला लागलीच अटक करण्यात आली. याबाबत अधिकची माहिती आता पोलीस तपासातूनच समोर येणार आहे. याबाबतचे वृत्त आज एका दैनिकाने प्रसिद्ध केले आहे.
