जळगाव (प्रतिनिधी) राजनंदिनी बहुउद्देशीय संस्थेतर्फे जिल्हा कृषी औद्योगिक सर्व सेवा सहकारी संस्थेच्या चेअरमन शैलेजादेवी दिलीपराव निकम यांना ‘नारीरत्न पुरस्कार २०२०-२१’ चे वितरण २६ सप्टेंबर रोजी सकाळी ११ वाजता व.वा.वाचनालयाच्या सभागृहात पालकमंत्री ना.गुलाबराव पाटील यांच्या हस्ते करण्यात येणार आहे. कार्यक्रमाच्या अध्यक्षस्थानी विधानसभेचे माजी सभापती अरुणभाई गुजराथी हे राहतील.
शैलेजादेवी निकम यांचे राजकारण, समाजकारण, सहकार, महिला, आदिवासी व ग्रामीण आणि कृषी क्षेत्रातील उल्लेखनीय कार्य लक्षात त्यांना या पुरस्काराचे वितरण करण्यात येणार आहे. त्यांनी जिल्हा परिषदेच्या माजी सदस्या, राष्ट्रीय सहकारी संघाच्या समिती सदस्यापदी कार्य केले आहे. याप्रसंगी महापौर जयश्री महाजन, जिल्हा उपनिबंधक संतोष बिडवई, सिंगल वुमन फाऊंडेशनच्या अध्यक्षा मीनाक्षी चव्हाण आदी उपस्थित राहतील. उपस्थितीचे आवाहन संस्थेच्या अध्यक्षा संदिपा वाघ यांनी केले आहे.
