जळगाव (प्रतिनिधी) महानगरपालिकेचे आयुक्त सतीष कुलकर्णी (Satish Kulkarni) आणि प्रभारी शहर अभियंता (City Engineer) व्ही.ओ.सोनवणी (V.O. Sonwani) हे संगनमताने शासकीय निधीचा अपहार करीत असल्याची तक्रार सहाय्यक अभियंता अरविंद भोसले (Arvind Bhosale) यांनी नगरविकास विभागाचे प्रधान सचिव (Principal Secretary) यांच्याकडे केली आहे. या तक्रारीमुळे महापालिकेत एकच खळबळ उडाली आहे.
प्रधान सचिवांकडे अरविंद भोसले यांनी केलेल्या तक्रारीत म्हटले आहे की, प्रभारी शहर अभियंता सुनील भोळे आणि डी. एस. खडके यांच्या निवृत्तीनंतर प्रभारी शहर अभियंता पदाचा पदभार दिला होता. शहर अभियंता म्हणून काम करीत असताना मक्तेदाराकडून विकास कामांच्या देयकापोटी ३ टक्के प्रमाणे रक्कम आणून देण्यास आयुक्तांनी सांगितले असता, यावेळी नकार दिल्याने आयुक्तांनी माझ्यावर नाराजी व्यक्त केल्याचेही भोसले यांनी तक्रारीत म्हटले आहे.
तसेच नगरसेवक प्रशांत नाईक यांनी रॅम्प बांधण्याच्या कामाचे व देयकाची कागदपत्रे माहिती अधिकारात मागणी केली होती. त्यावेळी अपिल अधिकारी म्हणून मी ना कागदपत्र उपलब्ध करुन दिलीत. त्यावेळी देखील आयुक्तांनी नाराजी व्यक्त केली. रजेवरुन परत आल्यानंतर शहर अभियंता पदाचा पदभार देण्यात आलेला नव्हता. असेही त्यांनी तक्रारीत म्हंटले आहे.
अरविंद भोसले यांचे आरोप अत्यंत चुकीचे – आयुक्त सतीश कुलकर्णी
अरविंद भोसले यांचे आरोप अत्यंत चुकीचे असून, त्या आरोपांमध्ये कोणतेही तथ्य नाही. भोसले यांनी जे-जे आरोप केले आहेत, त्या आरोपांची तक्रार त्यांनी ज्या वेळी हे प्रकार घडल्याचे ते सांगत आहेत त्यावेळी का केली नाही ? त्यांची शहर अभियंता पदावरून बदली केल्यामुळेच त्यांचा हा संताप झाला आहे. तसेच जे आरोप त्यांनी केले त्याचे पुरावे तरी त्यांनी सादर करावे, असा इशारा जळगाव मनपा आयुक्त सतीश कुलकर्णी यांनी दिला आहे.
