जळगाव (प्रतिनिधी) येथील जिल्हा सामान्य रुग्णालयात उपचारादरम्यान मृत्यू झालेल्या एका महिलेच्या कानातील सोन्याचे दागिने लांबविल्याचा धक्कादायक प्रकार उघडकीस आल्यानंतर प्रचंड खळबळ उडाली आहे. मयत महिला जामनेर तालुक्यातील फर्दापूर येथील असल्याची माहिती समोर आलीय.
या संदर्भात अधिक असे की, फर्दापूर येथील इंदुबाई माणिक देवकर यांना न्युमोनिया असल्याने त्यांना जिल्हा रुग्णालयात उपचारासाठी दाखल करण्यात आले होते. मात्र उपचारादरम्यान काल १० नोव्हेंबर रोजी मृत्यू झाला. मृत शरीर कुटुंबियांच्या ताब्यात दिल्यानंतर कानातील सोन्याचे रिंगा चोरीला गेल्याचे निदर्शनास आले. सोन्याची रिंग ओरबाडून काढण्यात आल्याची जखम कानाला स्पष्ट दिसत आले. या चोरीची चौकशी व्हावी, अशी मागणी मयत महिलेच्या कुटुंबीयांनी शासकीय वैद्यकीय महाविद्यालयाचे अधिष्ठाता यांच्याकडे पत्राद्वारे केली आहे. तर वाकोद-पहूर गटाचे जिल्हा परिषद सदस्य अमित देशमुख यांनी मृत शरीराची विटंबना करणाऱ्यांवर कारवाईची मागणी केली आहे.
