डेहराडून (वृत्तसंस्था) उत्तराखंडात एका सरकारी शाळेत दलित महिलेने स्वयंपाक बनवला म्हणून उच्चभ्रू विद्यार्थ्यांनी जेवणावर बहिष्कार टाकल्याची घटना घडली आहे. उत्तराखंडातील चंपावत जिल्ह्यातील सुखीढांग भागातील जौल गावातील सरकारी माध्यमिक शाळेत हा प्रकार घडला आहे. सरकारी शाळांमध्ये विद्यार्थ्यांची उपस्थिती वाढवण्यासाठी विद्यार्थ्याना सकस आहार मिळावा यासाठी माध्यान्ह भोजन योजना सुरू करण्यात आली आहे.
सुखीढांग भागातील जौल गावातील सरकारी माध्यमिक शाळेत सुनीता देवी यांची नुकतीच भोजनमाता म्हणून नियुक्ती केली होती. इयत्ता सहावी ते आठवीच्या वर्गांतील विद्यार्थ्यांसाठी माध्यन्ह्य भोजन बनविण्याची जबाबदारी त्यांच्यावर शाळा प्रशासनाने सोपविली होती. शाळेचे मुख्याध्यापक प्रेमसिंह यांनी दिलेल्या माहितीनुसार सुनीता यांनी पहिल्या दिवशी तयार केलेले अन्न उच्च जातींमधील विद्यार्थ्यांनी खाल्ले होते. पण दुसऱ्या दिवशी त्यांनी अन्नावर बहिष्कार घालण्यास सुरुवात केली. एकूण ५७ विद्यार्थ्यांपैकी अनुसूचित जातीतील १६ विद्यार्थ्यांनी माध्यान्ह्य भोजन केले.
भोजन करण्यास नकार देणाऱ्या विद्यार्थ्यांना समजावून सांगण्याऐवजी त्यांच्या पालकांनी शाळा व्यवस्थापन आणि मुख्याध्यापकांवरच आरोप केले. शाळेत जेवण बनविण्यासाठी त्यांनी उच्च जातीमधील उमेदवाराची निवड जाणीवपूर्वक केली नाही, असे त्यांचे म्हणणे आहे. शाळेतील पालक -शिक्षक संघटनेचे अध्यक्ष नरेंद्र जोशी म्हणाले की, गेल्या महिन्यात झालेल्या बैठकीत आम्ही पुष्पा भट या महिलेची भोजनमाता म्हणून नियुक्ती केली होती. तिचा मुलगाही याच शाळेत शिकतो आणि ती गरजूही होती. पण मुख्याध्यापक व शाळा व्यवस्थापनाने त्याकडे दुर्लक्ष करीत दलित महिलेची निवड केली. शाळेत उच्च जातीच्या विद्यार्थ्यांची संख्या जास्त असल्याने अशा जातींमधील महिलेचीच या पदावर नियुक्ती करायला हवी होती, असेही ते म्हणाले.
